- २४ भाद्र २०८३, बुधबार / Sep 9, 2026
काठमाडौं, १४ जेठ । कर्णाली करिडोरको हुम्ला खण्डअन्तर्गत सर्केगार्ड गाउँपालिका–१ स्थित खच्चा क्षेत्रमा सुख्खा पहिरो खस्दा सडक अवरुद्ध भएको छ।
हिजो बेलुकी खसेको पहिरोले सडक पुरेपछि यातायात सेवा पूर्ण रूपमा बन्द भएको हो। करिब दश मिटर माथिबाट आएको सुख्खा पहिरोले ठूलो मात्रामा माटो र ढुङ्गा सडकमा थुपारेको छ।
पहिरो खसेलगत्तै उपकरण प्रयोग गरेर सडक खुलाउने प्रयास गरिएको भए पनि सानो उपकरणले काम गर्न नसकेपछि अहिले ठूला उपकरणको खोजी भइरहेको जिल्ला प्रहरी कार्यालय हुम्लाका प्रहरी नायब उपरीक्षक शङ्कर खड्काले जानकारी दिए।
सडक अवरुद्ध हुँदा माथिल्लो हुम्लाका पाँच गाउँपालिकातर्फ जाने तथा त्यहाँबाट आउने सवारी साधन सर्केगार्ड र खच्चा क्षेत्रमा रोकिएका छन्।
यात्रुहरू बीच बाटोमै अलपत्र परेका छन्। स्थानीयका अनुसार उक्त क्षेत्रमा पटक–पटक सुख्खा पहिरो खस्ने समस्या रहँदै आएको छ। वर्षायाम सुरु भएसँगै जोखिम अझ बढेको बताइएको छ।
