जेनजी आन्दोलनका घाइतेलाई ४८ लाख रुपैयाँ राहत वितरण

काठमाडौँ, ४ कार्तिक । सरकारले ‘जेनजी’ आन्दोलनका क्रममा घाइते भएका व्यक्तिहरूको भैपरी खर्चबापत ४८ लाख ५८ हजार रुपैयाँ निकासा गरेको छ। स्वास्थ्य तथा जनसङ्ख्या मन्त्रालयको प्रारम्भिक प्रतिवेदनका आधारमा हरेक घाइतेलाई २० हजार रुपैयाँ दरले रकम वितरण गर्न पठाइएको हो।

पहिलो चरणमा झापा, मोरङ, सुनसरी, काठमाडौँ, ललितपुर, कास्की, सुर्खेत, कैलाली र डडेलधुरामा रकम पठाइसकेको गृह मन्त्रालयले जनाएको छ। प्राविधिक समितिले घाइतेको वर्गीकरण गरेपछि उचित राहत रकम व्यवस्था गर्ने गरी तत्कालका लागि भैपरी खर्चबापत रकम उपलब्ध गराउने निर्णय मन्त्रिपरिषद्ले असोज १२ गते गरेको थियो।

अहिलेसम्म स्वास्थ्य मन्त्रालयले २,४२९ जना घाइतेको विवरण गृह मन्त्रालयमा उपलब्ध गराएको छ। गएको भदौ २३ र २४ गतेको प्रदर्शनका क्रममा घाइते भएका व्यक्तिहरूको पहिचान र सहज उपचारको व्यवस्थाका लागि सरकारले परिचयपत्र वितरण पनि गरेको छ। घाइतेको पुनः उपचारका लागि तोकिएका अस्पतालहरूमा जेन–जी क्लिनिक सञ्चालनमा रहेका छन्। स्वास्थ्य मन्त्रालयका अनुसार अहिलेसम्म एक अर्ब रुपैयाँभन्दा बढी रकम घाइतेको उपचारमा खर्च भएको छ।