- २२ भाद्र २०८३, सोमबार / Sep 7, 2026
सुनसरी, १९ असोज । अविरल वर्षाका कारण सप्तकोशी नदीमा पानीको बहाव तीव्र रूपमा बढ्दै गएपछि कोशी ब्यारेजका ५० वटा गेट खोलिएको छ। जिल्ला प्रहरी कार्यालय सुनसरीका प्रवक्ता प्रहरी नायब उपरीक्षक (डीएसपी) योगराज खतिवडाका अनुसार, शनिबार बिहान सवा ८ बजे नदीको जलबहाव मापन गर्दा प्रतिसेकेण्ड ३ लाख ३५ हजार क्यूसेक पुगेपछि ब्यारेजका ५६ मध्ये ५० ढोका खोलिएको हो।
उनका अनुसार शुक्रबार बेलुका ८ बजे मात्र नदीको बहाव एक लाख ९३ हजार ६० क्यूसेक थियो र त्यतिबेला १५ ढोका मात्र खोलिएका थिए। तर, लगातार वर्षा जारी रहेपछि शनिबार बिहानदेखि नदीको बहाव तीव्र गतिमा बढ्दै गएको र थप ढोका खोल्नुपर्ने अवस्था आएको हो।
गत भदौ १७ गते पनि सप्तकोशीमा पानीको बहाव अत्यधिक बढ्दा ५६ मध्ये ३८ गेट खोलिएको थियो। त्यसपछि पानीको सतह घट्दै गएको थियो तर पछिल्ला दुई दिनदेखि पूर्वी पहाडमा भइरहेको अविरल वर्षाका कारण पुनः नदीमा पानीको बहाव बढेको हो। कोशी ब्यारेजमा पानीको प्रवाह एक लाख ५० हजार क्यूसेक नाघेपछि खतराको सङ्केतस्वरूप रातो बत्ती बालिन्छ।
अहिले ब्यारेज कन्ट्रोल रुमका अनुसार तीनवटा रातो बत्ती बलिरहेको छ, जसले उच्च सतर्कताको अवस्था जनाउँछ। स्थानीय प्रशासनले आसपासका बासिन्दालाई नदी किनारबाट टाढा रहन र कुनै आपत् परेमा तुरुन्त सम्बन्धित निकायलाई जानकारी दिन आग्रह गरेको छ।सप्तकोशी नदीमा अझै पानीको बहाव बढ्ने सम्भावना रहेको बताउँदै प्रहरी प्रवक्ता खतिवडाले सतर्कता अपनाउन सबैलाई अनुरोध गरेका छन्।
