- २९ श्रावण २०८३, शुक्रबार / Aug 14, 2026
काठमाडौं । भारतीय सेना मालदिभ्सबाट फिर्ता भएको छ । मालदिभ्सको राष्ट्रपतिमा मोहम्मद मुइज्जु निर्वाचित भएपछि उनले भारतीय सैनिकलाई फिर्ता पठाएका हुन । भारतीय सैनिकलाई स्वदेश फिर्ता हुन दिइएको अन्तिम समयसीमा सकिनु एक दिन अगाडि नै मालदिभ्सका विदेशमन्त्री मुसा जमिर विहीबार भारत भ्रमण गरेका थिए ।
यसै सन्दर्भमा भारतीय विदेश मन्त्रालयले विहीबार पत्रकार सम्मेलन गरी मालदिभ्सबाट भारतीय सैनिक फिर्ता भएको जानकारी दियो । पत्रकार सम्मेलनमा भारतीय विदेश मन्त्रालयका प्रवक्ता रणधीर जयसवालले दिएको जानकारी अनुसार सैनिकहरुको स्थानमा गैरसैनिक प्राविधिक टोली खटाइएको छ ।
मालदिभ्सका तीन विमानस्थलमा भारतीय सैनिक तैनाथ थिए । उनीहरुले हिन्द महासागरमा निगरानी राख्दथ्ये । ‘इण्डिया आउट’ चुनावी नारा दिएर सत्तामा आएका मुइज्जुले भारतीय सैनिकलाई फिर्ता हुन १० मार्चदेखि १० मेसम्म समयसीमा दिएका थिए ।
एड्डु विमानस्थलमा २५ भारतीय सैनिक तैनाथ थिए । उनीहरु १० मार्चभन्दा अघि नै भारत फिर्ता भइसकेका थिए । एड्डु विमानस्थलमा भारतका दुई हेलिकप्टर र एउटा हवाईजहाज छन् । तिनको सन्चालन अब गैरसैनिक कर्मचारीहरुले गर्ने मालदिभ्स मिहारु पत्रिकाले जनाएको छ ।
