- २३ बैशाख २०८३, बुधबार / May 6, 2026
काठमाडौं । यो बर्खामा पनि मेलम्चीको पानी काठमाडौं उपत्यका नआउने भएको छ। पानी ल्याउन मेलम्ची खोलाको बाँध क्षेत्रमा बाढी रोक्ने कुनै पनि पूर्वाधार अहिलेसम्म पनि नबनाउँदा यस वर्ष पनि बर्खामा काठमाडौंवासीले मेलम्चीको पानी खान नपाउने भएका हुन्।
मेलम्ची खानेपानी विकास समितिका कार्यकारी निर्देशक रत्न लामिछानेका अनुसार ठूलो पानी पर्नासाथै पानीमा लेदो आउने र लेदोले सुरुङ मार्गमा असर पार्ने भएकाले बर्खामा पानी ल्याउन बन्द गरिनेछ। उनका अनुसार सुरुङ मार्गमा बाढी रोक्ने पूर्वाधार बनिनसकेकाले लेदोसहितको बाढी आउनेबित्तिकै सुरुङमा असर पार्ने हुँदा पानी पथान्तर गरिने छैन।
वर्षामा दुई महिना पानी उपत्यका नआउने उनको भनाइ छ। गतवर्ष बाढीले गरेको हेडवर्क्स अहिलेसम्म नबनेकाले बर्खामा पानी उपत्यका ल्याउन नसकिने उनी बताउँछन्।
मेलम्चीको मुहानमा हाइड्रोलिक उपकरण राखे पनि गत वर्ष साउन २८ र २९ गते आएको बाढीले सुरुङको मुखमा क्षति गरेको थियो।
