मिनीट्रक दुर्घटनामा चालकको मृत्यु, सहचालक उपचारमा

काठमाडौं, ३० जेठ । रूकुमपश्चिमको त्रिवेणी गाउँपालिका–२ सिम्रुतु बजार नजिकै मिनीट्रक दुर्घटना हुँदा चालकको मृत्यु भएको छ।बिहीबार साँझ दाङबाट रूकुमपश्चिमको खलङ्गातर्फ आउँदै गरेको रा१क १४१२ नम्बरको मिनीट्रक दुर्घटनामा परेको हो।

दुर्घटनामा परी ४५ वर्षीय चालक भुपेन्द्र महत गम्भीर घाइते भएका थिए। दाङको घोराही उपमहानगरपालिका–१० स्थायी घर भएका महतको उपचारका क्रममा मृत्यु भएको प्रहरीले जानकारी दिएको छ।

त्यसैगरी, सोही दुर्घटनामा घाइते सहचालक ३४ वर्षीय सुन्दरकुमार बुढाको जिल्ला अस्पताल सल्लेमा उपचार भइरहेको जिल्ला प्रहरी कार्यालय रूकुम पश्चिमका सूचना अधिकारी प्रहरी निरीक्षक ऋषि पाठकले बताए। प्रहरीका अनुसार, मिनीट्रकको ब्रेक फेल भएर दुर्घटना भएको हुन सक्ने अनुमान गरिएको छ।