लमजुङका स्थानीयलाई मोबाइलमा नेटवर्क खोज्दै हिँड्नुपर्ने बाध्यता

लमजुङ । उत्तरी क्षेत्रका छ गाउँमा मोबाइल नेटवर्कले राम्रोसँग काम नगर्दा स्थानीयलाई समस्या भएको छ । स्थानीयले आफन्तसँग कुराकानी गर्न टावर खोज्दै डाँडातिर धाउनुपर्ने बाध्यता कहिले सम्म भन्दै गुनासो गरेका छन् ।

क्व्होलासोथर गाउँपालिकाअन्तर्गत वडा नं ३ का घलेगाउँ, बङ्गुम, खगुम, फुल्म्रौ, वडा नं ५ स्थित सानो सिङ्दी र ठूलो सिङ्दी क्षेत्रका स्थानीयलाई यस्तो समस्या भएको हो । यहाँ टावरले राम्रोसँग काम नगर्दा आफन्तसँग कुराकानी गर्न डाँडामा पुगेर फोन गर्नुपर्ने बाध्यता रहेको वडा अध्यक्ष तथा तल्लो सिङ्दीका स्थानीय गीतबहादुर गुरुङले बताए ।

आफूले पनि कार्यालयको काम परेमा घरबाट दश मिनेट हिँडेर चौतारी डाँडामा पुगेर फोन गर्नु परिरहेको दुःखेसो पोखे । नेपाल टेलिकम लमजुङ शाखा कार्यालयमा पसगाउँमा टावर क्षमता थपेर वा सिङ्दीमा टावर राखेर समस्या समाधान गर्नेबारे ध्यानाकर्षण गराइए पनि सुनुवाइ नभएको वडाध्यक्ष गुरुङले बताए ।