- ५ असार २०८३, शुक्रबार / Jun 19, 2026
काठमाडौं, २५ भदौ । नेपाल मजदुर किसान पार्टीले हालैको राजनीतिक घटनाक्रमप्रति आपत्ति जनाएको छ। अध्यक्ष नारायणमान बिजुक्छे (रोहित) को अध्यक्षतामा भदौ २८ गते बसेको केन्द्रीय सचिवालयको बैठकले आपत्ती जनाएको हो ।
पार्टीले बहुदलीय व्यवस्थाको ३५ वर्ष यता संयुक्त र एकल सरकारहरू जनताको पक्षमा नलागेर भ्रष्टाचार, असमानता, बेरोजगारी, महँगी जस्ता समस्या बढाएको जनाएकाे छ ।
हाल देखिएको राजनीतिक जटिलतालाई त्यसकै परिणाम भएकाे प्रेस वक्तव्य उल्लेख गरेकाे छ । विज्ञप्तिमा भनिएकाे छ बहुदलीय व्यवस्था पुनःस्थापनापछि ३५ वर्षमा संयुक्त वा एकल सरकारमार्फत बनेका शासकहरू जनताका निम्ति निःस्वार्थ सेवा गर्न नसकि भ्रष्टाचार, एकाधिकार, भागबन्डा लगायतका अनियमिततामा लिप्त भएकाे हुँदा भदौ २३ र २४ गतेको जन–जनअसन्तुष्टि छताछुल्ल भएकाे जनाएकाे छ ।
देश र जनताका समस्या समाधानका लागि राष्ट्रपतिबाट समयमा संविधानको संरक्षण तथा पालन भएन र राष्ट्रपतिमा अन्तरनिहित संवैधानिक अधिकार तत्काल प्रयोग गरिएन । समयमै शान्ति सुरक्षा कायम नहुँदा अकल्पनीय जनधनको क्षति भयो। अहिलेको गैरसंवैधानिक कदमको लागि राष्ट्रपति स्वयम्ले जिम्मेवारी लिनुपर्ने र इतिहासमा राष्ट्रपति दोषी साबित हुने उल्लेख गरिएकाे छ ।
शासक दलका नेताहरूको सहमतिमा भदौ २७ गते राष्ट्रपतिले पूर्वप्रधानन्यायाधीश सुशीला कार्कीलाई प्रधानमन्त्री नियुक्ति र प्रतिनिधिसभा विघटनलगायत संवैधानिक दायरा बाहिरबाट निकास दिनु भनेको जनताको भावनाविपरीत भएकाे नेमकिपाले ठहर गरेकाे छ ।
अहिलेको सङ्कटको लागि शासक दलहरू पनि इतिहासमा दोषी साबित हुने र प्रतिनिधिसभाका सभामुखले संसद्मा उठेका विषय कार्यान्वयन गराउन सरकारलाई निर्देशन दिने वा जवाफदेही बनाउनेजस्ता अत्यावश्यक काम गरेकाे र भदौ २३ र २४ गतेको जटिल अवस्थामा समेत सभामुखबाट सर्वदलीय बैठकको आयोजना नभएकाे विज्ञप्तिमा उल्लेख गरेकाे छ ।
विज्ञप्तिमा भनिएकाे छ इतिहासमा सभामुखसमेत यो सङ्कटको निम्ति दोषी साबित हुने छन् । नेपाल मजदुर किसान पार्टीले ठुला भ्रष्टाचारीहरूको सम्पत्ति राष्ट्रियकरण तथा उनीहरूलाई मृत्युदण्डसमेत हुने कानुनी व्यवस्था, नेपालीको सम्पत्तिको सीमाङ्कन र विदेशमा सम्पत्ति राख्न नपाउने, नेपालीलाई योग्यताअनुसार देशभित्र रोजगारी, शिक्षा-स्वास्थ्य उपचार निःशुल्क, व्यक्तित्व विकासमा समान अवसरलगायत बन्दोबस्त हुनुपर्ने विषय उठाउँदै आएको र यी न्यायोचित विषयमा नेमकिपा पुनः जोड दिने उल्लेख गरेकाे छ ।
नेमकिपाले वर्तमान जटिल राजनीतिक परिस्थितिमा वैदेशिक हस्तक्षेप बढिरहेको यथार्थप्रति सचेत हुँदै अमेरिकी साम्राज्यवाद र भारतीय एकाधिकार पुँजी एवम् विस्तारवादविरोधी सङ्घर्ष चालु राख्न सम्पूर्ण देशभक्त नेपालीमा आह्वान गरेकाे छ ।
