- १५ आश्विन २०८३, बिहीबार / Oct 1, 2026
लगातारको वर्षासँगै आएको बाढी र पहिरोले देशभरका मुख्य सडक तथा राजमार्ग प्रभावित भएका छन् ।
धादिङको पृथ्वी राजमार्गअन्तर्गत कृष्णभिर र चालीसे सडकखण्ड पूर्ण रूपमा अवरुद्ध छन् ।
परेवाभिर र ज्वाङखोलामा एकतर्फी रूपमा यातायात सञ्चालन भइरहेको छ ।
रसुवाको त्रिशूली–मैलुङ–स्याफ्रुबेंसी सडक बाढीका कारण पूर्ण रूपमा बन्द छ ।
नुवाकोटका केही सडकखण्डमा बाढी पहिरोको जोखिमका कारण रातिको समयमा सवारी सञ्चालनमा रोक लगाइएको छ ।
रोल्पाको सहिद राजमार्ग तथा कर्णालीका मुगु, कालिकोट, सुर्खेत र सल्यानका सडकखण्ड पनि पहिरोका कारण अवरुद्ध छन् ।
केही सडकमा जोखि
काठमाडौं, २२ भदौ । लगातारको वर्षासँगै आएको बाढी र पहिरोका कारण देशभरको सडक सञ्जाल प्रभावित भएको छ । बाढी तथा पहिरोले मुख्य राजमार्गका विभिन्न सडकखण्ड अवरुद्ध हुँदा यातायात सञ्चालनमा समस्या भएको छ ।
नेपाल प्रहरीले सोमबार बिहानसम्मको सडक अवस्थाबारे अद्यावधिक गर्दै काठमाडौं उपत्यकासहित बागमती, लुम्बिनी र कर्णाली प्रदेशका विभिन्न सडकखण्ड प्रभावित भएको जनाएको छ । कतिपय सडक पूर्ण रूपमा अवरुद्ध छन् भने केहीमा एकतर्फी यातायात सञ्चालन भइरहेको छ ।
बागमती प्रदेशअन्तर्गत धादिङको पृथ्वी राजमार्गमा बाढी तथा पहिरोले यातायातमा ठूलो समस्या सिर्जना गरेको छ । बेनीघाट रोराङ गाउँपालिका–७ स्थित कृष्णभिर र गजुरी गाउँपालिका–२ स्थित चालीसेमा सडक पूर्ण रूपमा अवरुद्ध भएको प्रहरीले जनाएको छ । गजुरी गाउँपालिकाकै परेवाभिर र बेनीघाट रोराङ गाउँपालिकाको ज्वाङखोलामा भने एकतर्फी रूपमा यातायात सञ्चालन भइरहेको छ ।
काठमाडौंको चन्द्रागिरि नगरपालिका–२ चिसापानीमा पहिरो खसेपछि काठमाडौं–धादिङ सडकखण्ड पनि एकतर्फी रूपमा मात्र सञ्चालनमा रहेको छ ।यसैगरी काभ्रेको बीपी राजमार्गअन्तर्गत खुर्कोट–नेपालथोक–कटुन्जेबेंसी सडकखण्डमा बाढीको सम्भावित जोखिमलाई ध्यानमा राख्दै सवारी सञ्चालनमा समय तथा तौलसम्बन्धी व्यवस्था गरिएको छ ।
१० टनसम्मका मालवाहक सवारीसाधनलाई बेलुकी ७ बजेदेखि बिहान ५ बजेसम्म मात्र सञ्चालन गर्न दिइएको छ । अन्य सवारीसाधनलाई भने सडकको अवस्था हेरेर बिहान ४ बजेदेखि बेलुकी ६ बजेसम्म सञ्चालन गर्न अनुमति दिइएको छ । रसुवाको उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी सडकखण्ड बाढीका कारण पूर्ण रूपमा अवरुद्ध भएको छ । उक्त सडकखण्डको अवरोध खुलाउन लामो समय लाग्न सक्ने प्रहरीले जनाएको छ ।
रसुवाकै मुख्य राजमार्ग पनि बाढीका कारण पूर्ण रूपमा ठप्प रहेको छ । नुवाकोटको शिवपुरी गाउँपालिका–८ घट्टेखोलास्थित टोखा–छहरे सडकखण्डमा बाढी तथा पहिरोको सम्भावित जोखिमलाई ध्यानमा राख्दै राति १० बजेदेखि बिहान ५ बजेसम्म सवारी सञ्चालनमा रोक लगाइएको छ ।
पासाङ ल्हामु राजमार्गअन्तर्गत नुवाकोटको बेत्रावतीस्थित सिमटारमा सडक पूर्ण रूपमा अवरुद्ध भएको छ । लुम्बिनी र कर्णाली प्रदेशका पहाडी तथा हिमाली जिल्लामा पनि पहिरोका कारण सडक यातायात प्रभावित भएको छ । लुम्बिनी प्रदेशको रोल्पास्थित परिवर्तन गाउँपालिका–३ भालखोरमा पहिरो खसेपछि सहिद राजमार्ग पूर्ण रूपमा अवरुद्ध भएको छ ।
कर्णाली प्रदेशमा पनि विभिन्न मुख्य सडकखण्ड ठप्प भएका छन् । मुगुको छायाँनाथ रारा नगरपालिका–४ ताल्चास्थित मुगु–गमगढी सडक पूर्ण रूपमा अवरुद्ध छ । कालिकोटको शुभकालिका गाउँपालिका–१ गगने खोला तथा खाँडाचक्र नगरपालिका–७ र ८ स्थित रातो पहाडमा पहिरो खसेपछि कर्णाली राजमार्ग पूर्ण रूपमा बन्द भएको प्रहरीले जनाएको छ ।
त्यस्तै, सुर्खेतको बराहताल गाउँपालिका–७ औलिसेस्थित कर्णाली राजमार्ग र सल्यानको कपुरकोट गाउँपालिका–४ आरीडंगाले फेदीमा पहिरो खसेपछि राप्ती राजमार्ग पनि पूर्ण रूपमा अवरुद्ध भएको छ । लगातारको वर्षाका कारण थप बाढी तथा पहिरो आउन सक्ने जोखिम रहेकाले प्रहरीले सडकको अवस्था बुझेर मात्र यात्रा गर्न तथा सम्बन्धित निकायले जारी गरेका सुरक्षा सूचनाको पालना गर्न आग्रह गरेको छ ।
