- ७ श्रावण २०८३, बिहीबार / Jul 23, 2026
ताशकेंट, उज्बेकिस्तान, ११ साउन । उज्बेकिस्तानको ताशकेंट शहरमा जुलाई २३ देखि २७ सम्म सम्पन्न वर्ल्ड यूथ सभात च्याम्पियनशिप २०२५ मा नेपालका बसिल त्वायनाले उल्लेखनीय प्रदर्शन गर्दै रजत पदक जित्न सफल भएका छन्।
प्रतियोगिताको दोस्रो दिन ८०(८५) केजी तौल समूहमा भएको लिग चरणको खेलमा बसिलले पहिलो खेलमा आयोजक देश उज्बेकिस्तानका जिदीरोभ मोहम्मदलाई पराजित गर्दै ३ अंक हासिल गरे। दोस्रो खेलमा अजरबैजानका मेहमेद सुलेमनोभलाई हराउँदै थप ३ अंक जोड्दा, तेस्रो खेलमा फ्रान्सका मलभिन पेरीईबाट वाकओभर पाएपछि कुल ९ अंकसहित फाइनलमा प्रवेश गरेका थिए।
फाइनलमा भने बसिलको पुनः भिडन्त फ्रान्सकै मलभिन पेरीईसँग भयो। निकै प्रतिस्पर्धात्मक खेलमा बसिल पराजित भई रजत पदकमै चित्त बुझाउनु परेको हो। पेरीई लिग चरणमा ७ अंकसहित फाइनल पुगेका थिए।
नेपालमा करिब दुई वर्षअघिदेखि मात्र सुरु भएको खेलमा यस्तो ऐतिहासिक उपलब्धि हासिल गर्नु गौरवको विषय भएको नेपाल सभात संघका अध्यक्ष, मुख्य प्रशिक्षक तथा एशियन सभात कन्फिडेरेशनका कार्यकारी सदस्य लक्ष्मण बस्नेतले बताए।
उनले भने, “हाम्रो खेलाडीले सभातको पावर हाउस मानिने देशहरू उज्बेकिस्तान, अजरबैजानलाई हराउँदै फ्रान्ससँग फाइनल खेलेर रजत जित्नु नेपालका लागि ऐतिहासिक सफलता हो।”
बस्नेतका अनुसार, फाइनलमा हार भइकन पनि थुप्रै अन्तर्राष्ट्रिय कोच र खेलाडीहरू बसिलको प्रदर्शनबाट प्रभावित भएका छन्। उनी थप्छन्, “यदि संघीय, प्रदेश र स्थानीय सरकारबाट आवश्यक लगानी र सहयोग पाइयो भने नेपाललाई पनि सभात खेलमा विश्वको पावर हाउस बनाउने हाम्रो आत्मविश्वास बलियो छ।”
