एन्फा निलम्बन फुकुवा गर्न फिफा–एएफसीको निर्देशन अस्वीकार, संयुक्त बैठकको प्रस्ताव

काठमाडौँ, २६ चैत्र । राष्ट्रिय खेलकुद परिषद् (राखेप) ले अखिल नेपाल फुटबल संघ (एन्फा) को निलम्बन फुकुवा गरी तत्काल चुनाव गराउन दिएको अन्तर्राष्ट्रिय निकायको निर्देशन अस्वीकार गरेको छ।

विश्व फुटबल महासंघ (फिफा) र एसियाली फुटबल महासंघ (एएफसी) ले गएको आइतबार राखेपलाई पत्र पठाउँदै एन्फामाथि गरिएको निलम्बनमा तेस्रो पक्षीय हस्तक्षेप भएको ठहर गर्दै सात दिनभित्र निलम्बन फुकुवा गरी निर्वाचन गराउन निर्देशन दिएका थिए।

तर राखेपले उक्त निर्देशन अस्वीकार गर्दै फिफा र एएफसीलाई औपचारिक पत्राचार गरेको जनाएको छ। राखेपले एन्फाको निलम्बन फुकुवा गर्ने विषयमा हतार नगरी सम्बन्धित सबै पक्षबीच छलफल आवश्यक रहेको बताएको छ।

राखेपले यस विषयमा एन्फा, फिफा, एएफसी र राखेपबीच संयुक्त बैठक आयोजना गरिनुपर्ने शर्त अघि सारेको छ। संयुक्त छलफलपछि मात्र निलम्बन फुकुवा गर्ने वा अन्य निर्णय लिने प्रक्रिया अघि बढाइने परिषद्ले जनाएको छ। यस घटनाक्रमले नेपाली फुटबल क्षेत्रमा थप विवाद उत्पन्न हुने सम्भावना देखिएको छ।