- २ बैशाख २०८३, बुधबार / Apr 15, 2026
काठमाडौँ । नेपाल विद्युत् प्राधिकरण ले जेनजी आन्दोलनका क्रममा सहिद भएका थप आठ परिवारका सदस्यलाई रोजगारी उपलब्ध गराउने निर्णय गरेको छ।
प्राधिकरण सञ्चालक समितिका अध्यक्ष तथा विराजभक्त श्रेष्ठ को अध्यक्षतामा बुधबार साँझ बसेको सञ्चालक समिति बैठकले थप आठ सहिद परिवारका सदस्यलाई रोजगारी दिने निर्णय गरेको हो।
जेनजी आन्दोलनका घाइते तथा सहिद परिवारलाई राहत उपलब्ध गराउनेसम्बन्धी कार्यविधि २०८२ को बुँदा नम्बर ११ तथा नेपाल राजपत्र (खण्ड ७५, अतिरिक्ताङ ३२, कात्तिक १७, २०८२) मा भएको व्यवस्थाअनुसार यसअघि छुट भएका आठ जना सहिद परिवारका सदस्यलाई रोजगारी दिने निर्णय गरिएको मन्त्री श्रेष्ठको सचिवालयले जनाएको छ।
यसअघि नै प्राधिकरणले २७ जना सहिद परिवारका सदस्यलाई रोजगारी दिने प्रक्रिया अगाडि बढाइसकेको छ। अहिले थप गरिएका आठ जनामा रोजित श्रेष्ठ (काठमाडौँ), अम्बिका विश्वकर्मा (उदयपुर), सुमित्रा महत (सिन्धुपाल्चोक), शीतल पौडेल (काठमाडौँ), मौसम कुलुङ (सङ्खुवासभा), पार्वती अधिकारी (सर्लाही), हेमन्ती विष्ट (बझाङ) र मञ्जु पौडेल (लमजुङ) रहेका छन्।
