- २९ श्रावण २०८३, शुक्रबार / Aug 14, 2026
काठमाडौँ । राष्ट्र बैंक र नेपाल प्रहरीको केन्द्रीय अनुसन्धान ब्यूरो (सीआईबी)ले प्रभु बैंकको केन्द्रीय कार्यालयमा छापा मारेका छन्। शुक्रबार साँझ संयुक्त टोलीले काठमाडौँको बिजुलीबजारस्थित बैंकको केन्द्रीय कार्यालयमा प्रवेश गरी छानबिन गरेको हो।
आर्थिक अपचलनमा प्रभु समूहका अध्यक्ष देवीप्रसाद भट्टचन पक्राउ परेपछि थप प्रमाण संकलनका लागि उक्त छापा मारिएको सीआईबीका प्रवक्ता प्रहरी वरिष्ठ उपरीक्षक शिवकुमार श्रेष्ठले पुष्टि गरे। उनका अनुसार छानबिनका क्रममा केही महत्त्वपूर्ण फाइल र कागजात नियन्त्रणमा लिइएका छन्।
राष्ट्र बैंकको सहकार्यमा सुरु भएको यो छानबिन प्रभु बैंकसँग सम्बन्धित आर्थिक अनियमितता र ठगी प्रकरणमा केन्द्रीत रहेको बताइएको छ। यसअघि प्रभु म्यानेजमेन्टकी अध्यक्ष कुसुम लामाले करिब ९८ करोड रुपैयाँ ठगी भएको भनी दायर गरेको जाहेरीका आधारमा कात्तिक ११ गते भट्टचन ललितपुरबाट पक्राउ परेका थिए।
सरकारी वकिल कार्यालयले गत वर्ष नै जिल्ला प्रहरी परिसरलाई अनुसन्धान गर्न निर्देशन दिएको थियो। तर पर्याप्त प्रगति नभएपछि सो मुद्दामा सीआईबीले प्रत्यक्ष कारबाही (एक्सन) लिएको हो। छानबिनको निष्कर्षपछि आर्थिक अपचलन र ठगी सम्बन्धी थप कानूनी प्रक्रिया अघि बढाइने जनाइएको छ।
