- २३ बैशाख २०८३, बुधबार / May 6, 2026
काठमाडौं । राप्रपा नेपालले कांग्रेस-एमालेको नयाँ गठबन्धन बन्नुले गणतन्त्रको असफलतालाई प्रमाणित गरेको विश्लेषण गरेको छ । राप्रपा नेपालको केन्द्रीय कार्य सम्पादन समितिको बैठकले ठूलो तामझाम, आश्वासन र प्रतिबद्धता व्यक्त गर्दै एमाले र माओवादी केन्द्रले गठन गरेको सत्ता गठबन्धनलाई चार महिनामा नै विस्थापित गर्नु र काँग्रेस र एमालेले नयाँ गठबन्धन निर्माण गर्नुले धर्म निरपेक्ष गणतन्त्रको असफलतालाई प्रमाणित गरेको निष्कर्ष निकालेको हो ।
संसदका दुई ठूला दल मिलेर सरकार बनाउनु आफैंमा विडम्वनापूर्ण रहेको बताउँदै यो संसदीय मूल्य र मान्यता विपरीतको कार्य भएको ठहर राप्रपा नेपालले गरेको छ । साथै राप्रपा नेपालले नेपाली राजनीतिमा विद्यमान सत्ताकेन्द्रित फोहरी प्रतिस्पर्धा, भ्रष्ट प्रवृत्ति र अस्थिरता पुनः उजागर भएको निष्कर्ष निकालेको छ ।
नयाँ सत्ता गठबन्धन कुनै सिद्धान्त, नीति र जनादेशको आधारमा बनेको नभई यो नितान्त सत्ता स्वार्थ र भ्रष्टाचारको कारबाहीबाट जोगिने रणनीतिको परिणाम भएको राप्रपाले जनाएको छ ।
