- ३० श्रावण २०८३, शनिबार / Aug 15, 2026
सल्यान । सल्यानको कपुरकोट गाउँपालिका–३ चोरखोलमा जिप दुर्घटना हुँदा चालकको मृत्यु भएको छ भने तीन जना घाइते भएका छन् ।
रुकुमपूर्वको सिस्ने गाउँपालिकाबाट दाङतर्फ जाँदै गरेको ग १ ज ३५६१ नम्बरको पिकअप जिप बुधबार बिहान करिब पौने पाँच बजेतिर दुर्घटनामा परेको प्रहरीले जनाएको छ ।
दुर्घटनामा रुकुमपूर्व सिस्ने गाउँपालिका–४ अमलाचौरका ३१ वर्षीय विजय विश्वकर्माको घटनास्थलमै मृत्यु भएको छ । मृतक विश्वकर्मा जिप चालक रहेको प्रहरी चौकी कपुरकोटले जनाएको छ ।
बिरामी बोकेर हिँडेको उक्त जिपमा चालकसहित चार जना सवार थिए । दुर्घटनामा दुई महिला र एक बालिका घाइते भएका छन् । घाइते हुनेमा सिस्ने गाउँपालिका–२ नाइघाटकी २२ वर्षीया सुष्मी रोका , ४० वर्षीया ललिता केसी र १८ महिनाकी बालिका सफलता केसी रहेका छन् ।
घाइते तीनै जनालाई उद्धार गरी कपुरकोट गाउँपालिकाको आधारभूत अस्पतालमा प्राथमिक उपचार गरिएको छ । थप उपचारका लागि उनीहरूलाई दाङको तुलसीपुर पठाइएको प्रहरीले जनाएको छ ।
दुर्घटनाको कारणबारे प्रहरीले थप अनुसन्धान गरिरहेको छ ।
