मुख्य बुँदा

 आगामी फागुन २१ प्रतिनिधिसभा निर्वाचन शान्तिपूर्ण बनाउन निर्देशन

 माघ १५–२० भित्र इजाजतप्राप्त हातहतियार बुझाउन आग्रह

जिल्ला प्रहरी कार्यालय वा स्थानीय प्रशासन कार्यालयमा बुझाउन सकिने

 नबुझाए कानुनबमोजिम कारबाही

निर्वाचनपछि फिर्ता लिन सकिने

बैतडी, माघ ७ । आगामी फागुन २१ गते हुने प्रतिनिधिसभा सदस्य निर्वाचन शान्तिपूर्ण वातावरणमा सम्पन्न गराउने उद्देश्यले विभिन्न जिल्ला प्रशासन कार्यालयले व्यक्तिका नाममा दर्ता भएका इजाजत प्राप्त हातहतियार प्रहरी–प्रशासनलाई बुझाउन आग्रह गरेको छ ।

सहायक प्रमुख जिल्ला अधिकारी कृष्ण थापाका अनुसार व्यक्तिका नाममा इजाजतप्राप्त हातहतियार माघ २० गतेभित्र अनिर्वाय रुपमा बुझाउन निर्देशन दिइएको छ । इजाजतप्राप्त हातहतियार र सोमा प्रयोग हुने गोलीगठ्ठा जिल्ला प्रहरी कार्यालय वा आफ्नो पायक पर्ने प्रहरीचौकी वा स्थानीय प्रशासन कार्यालमा बुझाउन सकिने छ ।

त्यसैगरी, रुपन्देही जिल्ला प्रशासन कार्यालयले पनि यही माघ १५ गतेभित्र बुझाउन सूचना जारी गरेको छ । जिल्ला प्रहरी कार्यालय वा नजिकको प्रहरी एकाइमा हातहतियार बुझाउन उक्त कार्यालयले सम्बद्ध सबैमा अनुरोध गरेको छ ।

यसैगरी, लमजुङ जिल्ला प्रशासन कार्यालयले पनि एक सूचना जारी गरी यही माघ २० गतेभित्र आफूसँग भएका इजाजतप्राप्त हातहतयिार बुझाउन नागरिकलाई आग्रह गरेको हो । लमजुङमा एक हजारभन्दा व्यक्तिसँग त्यस्ता हातहतियार रहेका उक्त कार्यालयले जनाएको छ ।

व्यक्तिगत सुरक्षाका लागि आफूसँग भएका इजाजत प्राप्त हातहतियार नबुझाए कानुनबमोजिम कारबाही हुने चेतावनी ती स्थानीय प्रशासनले दिएका छन् । बुझाइएका हातहतियार निर्वाचन सम्पन्न भएपछि फिर्ता लिन सकिने ती कार्यालयले जारी गरेका सूचनामा जनाइएको छ । रासस

मुख्य बुँदा 

फागुन २१ को निर्वाचनलाई स्वतन्त्र, निष्पक्ष, भयरहित वातावरणमा सम्पन्न गराउन नेपाल प्रहरीले ‘एकीकृत सुरक्षा योजना, २०८२’ निर्माण

गस्ती परिचालनमा सुधार, पहुँच विस्तार

लामो दूरीको गस्ती १,१३६ पटक, सानो दूरीको गस्ती ३,८९,९६० पटक

१३ लाख ४६ हजार ३२८ सुरक्षाकर्मी परिचालित

तोडफोड, आगजनी र अन्य अवाञ्छित गतिविधि नियन्त्रणमा विशेष ध्यान

सीमाक्षेत्र निगरानी, उम्मेदवार–मतदाता सुरक्षा, फरार कैदी पक्राउने टोली परिचालन

काठमाण्डौ, ४ पुस । आउँदो फागुन २१ गते हुने चुनावलाई स्वतन्त्र, निष्पक्ष, भयरहित तथा विश्वसनीय वातावरणमा सम्पन्न गराउन नेपाल प्रहरीले ‘एकीकृत सुरक्षा योजना, २०८२’ निर्माण गरी सुरक्षा व्यवस्था चुस्त बनाउन थालेको छ ।

चुनावलाई लक्षित गर्दै नेपाल प्रहरीले जनशक्ति परिचालन तथा व्यवस्थापनलाई थप प्रभावकारी बनाएको छ । निर्वाचन आयोगबाट प्राप्त निर्देशन तथा निर्णयहरूलाई आत्मसात गर्दै उपलब्ध स्रोत र साधनको अधिकतम उपयोग गरी चुनाव सम्पन्न गर्न नेपाल प्रहरी दृढ सङ्कल्पित रहेको केन्द्रीय प्रहरी प्रवक्ता प्रहरी नायब महानिरीक्षक अविनारायण काफ्लेले बताउनुभयो ।

उहाँका अनुसार चुनाव लक्षित गस्तीलाई थप प्रभावकारी बनाइँदै पहुँचलाई व्यापक बनाइएको छ ।अहिलेसम्म लामो दूरीको गस्ती १ हजार १ सय ३६ पटक र सानो दूरीको गस्ती ३ लाख ८९ हजार ९ सय ६० पटक गरिएको छ ।

ती गस्तीमा १३ लाख ४६ हजार ३२८ जना सुरक्षाकर्मी परिचालित भएका छन् । चुनावमा हुन सक्ने तोडफोड, आगजनी तथा अन्य अवाञ्छित गतिविधि नियन्त्रण गर्न प्रहरीले दिनानुदिन गस्तीलाई अझ प्रभावकारी बनाउँदै आएको छ । सूचना सङ्कलन, खतरा मूल्याङ्कन, विश्लेषण तथा सूचनाको प्रवाहलाई प्रभावकारी बनाइएको छ ।

सीमाक्षेत्रमा हुने घुसपैठ तथा आपराधिक क्रियाकलाप नियन्त्रणका लागि पनि नियमित अनुगमनसहित प्रहरी परिचालन गरिएको छ । उम्मेदवार, मतदाता, राजनीतिक दलका नेता, विशिष्ट व्यक्ति, निर्वाचन पर्यवेक्षक, सञ्चारकर्मी, चुनाव प्रचार–प्रसार तथा विजय जुलुसको सुरक्षालाई मजबुत बनाउन आवश्यक सुरक्षा रणनीति अवलम्बन गरिएको उहाँले बताउनुभयो ।

आन्दोलनका क्रममा लुटिएका तथा हराएका हातहतियारबाट उत्पन्न हुन सक्ने जोखिम न्यूनीकरण गर्न नेपाल प्रहरीले विशेष टोली गठन गरी परिचालन गरेको छ । लुटिएका हातहतियारको पहिचान तथा बरामद गर्नुका साथै फरार कैदीबन्दी र थुनुवाको पक्राउ कार्यमा पनि प्रहरी सक्रिय रहेको जनाइएको छ । रासस

मुख्य बुँदा

मतदाता नामावली संकलन र अद्यावधिकमा उत्साह बढ्यो

असोज ९ देखि नामावली संकलन सुरु, १ लाखभन्दा बढी नयाँ मतदाता थप

फागुन २१ को चुनावमा भोट दिन १८ वर्ष उमेर पूरा हुनुपर्ने

प्रि–रजिष्ट्रेसन अनलाइन माध्यमबाट पनि सम्भव

ठेगाना फरक भए बसाइँसराइ वा विवाह प्रमाणपत्र आवश्यक

काठमाण्डौ, २० कार्तिक । आउँदो फागुन २१ गते हुने प्रतिनिधिसभा चुनावका लागि मतदाता नामावली संकलन तथा अद्यावधिकको काम उत्साहजनक रुपमा भइरहेको छ।

दशैँ, तिहार र छठका कारण केही समय उत्साह कम देखिएको भए पनि, पछिल्ला केही दिनयता नामावली संकलनमा उत्साह बढ्न थालेको निर्वाचन आयोगले जनाएको छ।

आयोगका सातवटै प्रदेश र सबै जिल्ला निर्वाचन कार्यालयबाट हरेक दिन बिहान ८ बजेदेखि बेलुका ६ बजेसम्म नामावली संकलन तथा अद्यावधिक भइरहेको छ। आयोगले असोज ९ गतेदेखि नामावली संकलन सुरु गरेकोमा अहिलेसम्म एक लाखभन्दा बढी नयाँ मतदाता थपिएका छन्।

आयोगका अनुसार, यो महिनाभरी मतदाता नामावलीमा नाम दर्ता गर्न सकिन्छ। १६ वर्ष उमेर पुगेका नागरिकहरूले नाम दर्ता गर्न सक्ने भए पनि फागुन २१ गतेको चुनावमा भोट दिन १८ वर्ष पूरा भएको हुनुपर्नेछ।

नाम दर्ता गर्न इच्छुकले सम्बन्धित निर्वाचन कार्यालय वा निर्वाचन आयोगले तोकेको मतदाता नामावली दर्ता स्थलमा नागरिकताको प्रमाणपत्रका साथ उपस्थित भई जैविक विवरण (बायोम्याट्रिक) दिनुपर्नेछ। यसरी विवरण दिन समय लिनका लागि पूर्वदर्ता (प्रि–रजिष्ट्रेसन) अनलाइन माध्यमबाट पनि गर्न सकिन्छ।

यदि नागरिकको बसोबास नागरिकता प्रमाणपत्रमा उल्लेख भएको ठेगानासँग फरक छ भने, बसाइँसराइ प्रमाणपत्र वा विवाह प्रमाणपत्र पेश गरी नाम दर्ता गर्न सकिन्छ।

मुख्य बुँदा

प्रधानमन्त्री सुशीला कार्की र निर्वाचन आयोगबीच निर्वाचन तयारीबारे सिंहदरबारमा भेटवार्ता,

आगामी फागुन २१ गतेका लागि निर्वाचन कार्यतालिका सार्वजनिक भइसकेको अवस्थामा छलफल केन्द्रित,

आयोगको प्रतिबद्धता — स्वच्छ, निष्पक्ष, स्वतन्त्र र मितव्ययी निर्वाचन,

स्रोतसाधनको व्यवस्था र परिचालनमा सरकारले सहयोग गर्ने प्रतिबद्धता,

प्रधानमन्त्रीले दलहरूसँग पनि निर्वाचनका विषयमा छलफल गर्ने तयारी जनाएको।

काठमाडौँ, २१ असाेज । प्रधानमन्त्री सुशीला कार्कीसँग आसन्न निर्वाचनको तयारीका विषयमा निर्वाचन आयोगका पदाधिकारीहरूले छलफल गरेका छन्।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा आगामी फागुन २१ गतेका लागि निर्वाचन कार्यतालिका सार्वजनिक भइसकेको अवस्थामा त्यसको कार्यान्वयनमा सरकार र राजनीतिक दलको सहयोगका विषयमा केन्द्रित रहेर छलफल भएको आयोगका प्रवक्ता नारायण प्रसाद भट्टराईले जानकारी दिए।

प्रवक्ता भट्टराईका अनुसार आयोगले स्वच्छ, निष्पक्ष र स्वतन्त्र एवं मितव्ययी निर्वाचन गराउन प्रतिबद्ध रहेको स्पष्ट पारेको छ। साथै, आयोगले निर्वाचन सम्पन्न गर्न आवश्यक स्रोत साधनको व्यवस्था र परिचालनमा सरकारबाट सहयोगको अपेक्षा गरिएको पनि जनाएको छ।

छलफलका क्रममा प्रधानमन्त्री कार्कीले निर्वाचन सम्पन्न गर्न सरकारका तर्फबाट सबै प्रकारको सहयोग गर्ने प्रतिबद्धता जनाइन्। उनले निर्वाचनका विषयमा राजनीतिक दलहरूसँग पनि शीघ्र छलफल गर्ने तयारी रहेको बताइन्।

गत भदौ २३ र २४ गतेको ‘जेनजी’ प्रदर्शनपछि पूर्वप्रधानन्यायाधीश कार्कीको नेतृत्वमा सरकार गठन भएको थियो र प्रतिनिधिसभा विघटन गर्दै आगामी फागुन २१ गतेका लागि निर्वाचन घोषणा गरिएको छ।