- ९ भाद्र २०८३, मंगलवार / Aug 25, 2026
तमिलनाडु सरकारले गरिब तथा कम आय भएका परिवारलाई वर्षमा तीनवटा एलपीजी ग्यास सिलिन्डर निःशुल्क दिने भएको छ ।
वार्षिक २ लाख ५० हजार भारतीय रुपैयाँसम्म आय भएका परिवारलाई लक्षित गरिएको छ ।
योजना आगामी जनवरीमा मनाइने पोङ्गल पर्वदेखि औपचारिक रूपमा लागू हुनेछ ।
ग्यास खरिद गरेपछि रकम परिवारकी मुख्य महिलाको बैंक खातामा सिधै पठाइनेछ ।
योजनाबाट करिब १ करोड ३० लाख परिवार लाभान्वित हुने र वार्षिक करिब ४० अर्ब भारतीय रुपैयाँ खर्च हुने अनुमान गरिएको छ ।
भारत, ८ भदौ । भारतको तमिलनाडु सरकारले विपन्न तथा कम आय भएका परिवारलाई हरेक वर्ष तीन वटा खाना पकाउने एलपीजी ग्यास सिलिन्डर निःशुल्क उपलब्ध गराउने घोषणा गरेको छ ।
तमिलनाडुका मुख्यमन्त्री सी. जोसेफ विजयले विधानसभालाई सम्बोधन गर्दै ‘अन्नपूर्णी सुपर सिक्स’ योजनाअन्तर्गत यस्तो सुविधा ल्याइएको जानकारी दिनुभएको हो ।
सरकारले वार्षिक दुई लाख ५० हजार भारतीय रुपैयाँसम्म आम्दानी भएका परिवारलाई कम आय वर्गमा राखेर यो योजना सञ्चालन गर्ने जनाएको छ । योजना आउँदो जनवरीमा मनाइने तमिलहरूको प्रमुख पर्व ‘पोङ्गल’देखि औपचारिक रूपमा लागू हुनेछ ।
योजना कार्यान्वयनका लागि प्रत्यक्ष लाभ हस्तान्तरण प्रणाली प्रयोग गरिनेछ । यसअनुसार लाभग्राहीले ग्यास सिलिन्डर खरिद गरेपछि त्यसको रकम सरकारले सम्बन्धित परिवारकी मुख्य महिलाको बैंक खातामा सिधै पठाउनेछ । सरकारको अनुमानअनुसार योजनाबाट तमिलनाडुका करिब १ करोड ३० लाख परिवार प्रत्यक्ष रूपमा लाभान्वित हुनेछन् ।
मुख्यमन्त्री विजयका अनुसार योजना सञ्चालनका लागि राज्य सरकारको ढुकुटीबाट वार्षिक करिब ४० अर्ब भारतीय रुपैयाँ खर्च हुनेछ ।बढ्दो महँगीका बीच सरकारले घोषणा गरेको यो योजनालाई तमिलनाडुका स्थानीयवासीले स्वागत गरेका छन् । सरकारले यसबाट कम आय भएका परिवारलाई खाना पकाउने इन्धनको खर्चमा राहत पुग्ने अपेक्षा गरेको छ ।
