एजेन्सी, २८ असाेज । अमेरिकी राष्ट्रपति डोनाल्ड ट्रम्पको सक्रियतामा गाजा शान्ति योजनामा हस्ताक्षर भएको छ। हमासले इजरायली बन्धकहरू रिहा गरेलगत्तै उक्त सम्झौतामा सहमति जुटाइएको हो।

इजिप्टको शर्म अल–शेखमा आयोजित गाजा शान्ति शिखर सम्मेलनमा इजिप्ट, कतार, टर्की र अमेरिकासहित २० भन्दा बढी देशका प्रतिनिधिहरू सहभागी थिए। सम्मेलनको मुख्य उपलब्धिका रूपमा गाजा शान्ति योजनाको घोषणापत्रमा हस्ताक्षर गरिएको हो।

ट्रम्पले कार्यक्रममा भनिन्, “आज गाजाका लागि नयाँ युगको सुरुआत भएको छ। अब पुनर्निर्माण र स्थायित्वतर्फ अघि बढ्ने समय आएको छ।” उनले इजरायल र हमासबीच युद्धविराम गराउन योगदान पुर्‍याएका मध्यपूर्वी देशका नेताहरूको प्रशंसा गरे।

हमासले हिजो मात्रै २० जना जीवित इजरायली बन्धक रिहा गरेको थियो। त्यसअघि नेपालका विद्यार्थी विपिन जोशीसहित चार जना मृत बन्धकको शव हमासले इजरायललाई हस्तान्तरण गरेको थियो। अझै २४ जना बन्धकको शव फिर्ता हुन बाँकी रहेको अन्तर्राष्ट्रिय सञ्चारमाध्यमहरूले जनाएका छन्।

एजेन्सी, १२ असार । युद्धविराम प्रयासका बाबजुद इजरायली सेनाले गाजामा आक्रमण जारी राख्दा कम्तीमा ८० जना प्यालेस्टिनी नागरिकको मृत्यु भएको छ। यस आक्रमणमा ४०० भन्दा बढी घाइते भएको अलजजिराले जनाएको छ।

यसैबीच, इजरायली सेनाले नाब्लसबाट १४ प्यालेस्टिनीहरूलाई गिरफ्तार गरेको छ, जसमा पत्रकार मुजाहिद तबान्जा पनि परेका छन्।हमास र इजरायलबीच युद्धविराम तथा बन्धक रिहाइका लागि प्रयास भइरहे पनि ठोस उपलब्धि नदेखिएको अन्तर्राष्ट्रिय सञ्चारमाध्यमहरूले जनाएका छन्।

बीबीसीका अनुसार, हमासका एक वरिष्ठ अधिकारीले मध्यस्थकर्ताहरूले युद्धविरामका लागि प्रयास तीव्र बनाएका छन् भने अमेरिकी राष्ट्रपति डोनाल्ड ट्रम्पका विशेष दूत स्टीव विटकफले दुवै पक्षबीचको सम्झौता नजिकिएको बताएका थिए।

यद्यपि, इजरायली अधिकारीले वार्तामा खासै प्रगति नभएको र मुख्य विषयमा असहमति कायमै रहेको बताएका छन्।