दैलेख, २९ चैत । विहीबार राति ठाटीकाँध गाउँपालिका–१, सिराडीमा एक तीन महिने शिशु गायव भएको छ। स्थानीय बमबहादुर बुढाकी छोरीलाई राति करिब ९ बजे अज्ञात समूहले लगेकाे परिवारको दाबी छ।

प्राप्त जानकारीअनुसार २-३ जना अज्ञात व्यक्तिहरूले पहिला घर नजिकैको खर र परालमा आगो लगाए। आगोको खबर पाएर घरका सबै जना निभाउन गएको मौकामा शिशुलाई गायव गरेको परिवारले बताएको छ। घटना लगत्तै स्थानीयले ठाटीकाँध प्रहरी चौकीमा खबर गरेका थिए। रातभर प्रहरी र स्थानीयले खोजतलास गरे पनि शिशुको कुनै अत्तोपत्तो लागेको छैन। परिवारले सामाजिक सञ्जाल र स्थानीय स्तरमा हार्दिक अपिल गर्दै बच्चाको खोजीमा सहयोग गर्न अनुरोध गरेको छ।

जिल्ला प्रहरी कार्यालय दैलेखले पनि सूचना पाए लगतै खोजी कार्य तीव्र बनाएको छ। सम्भावित सबै क्षेत्रमा प्रहरीले अनुसन्धान गरिरहेको र शंकास्पद व्यक्तिहरूमाथि निगरानी बढाएको जनाएकाे छ। परिवार र स्थानीयले शिशुको सुरक्षित उद्धारका लागि सबैसँग सहयोगको याचना गरेका छन्।