सिन्धुली, १७ साउन । मध्यपहाडी लोकमार्गअन्तर्गत सिन्धुली खण्ड आज बिहानैदेखि पहिरो र लेदोका कारण पूर्णरूपमा अवरुद्ध भएको छ। अविरल वर्षापछि गोलञ्जोर गाउँपालिका–६ स्थित अकरेभिर र बलेनीमा सडकमा ठूलो मात्रामा लेदो र माटो जमेर सवारीसाधन चल्न नसक्ने अवस्था भएको हो।

जिल्ला प्रहरी कार्यालय सिन्धुलीका प्रहरी नायब उपरीक्षक सूर्यप्रकाश सुवेदीका अनुसार ओखलढुङ्गाबाट काठमाडौँतर्फ जाँदै गरेको ११ वटा भैँसी लोड गरिएको ना ७ ख ७८९० नम्बरको ट्रक लेदोमा फसेपछि सडक एकतर्फी मात्र होइन, पूर्णरूपमा ठप्प भएको छ। त्यससँगै अन्य दुई ट्रक पनि विभिन्न स्थानमा फसेका छन्।

सडक अबरुद्ध भएपछि खुर्कोट-घुर्मी सडकखण्ड भएर यात्रा गर्ने सवारीसाधनहरु खुर्कोटमै रोकिएका छन्। विशेषगरी ओखलढुङ्गा, सोलुखुम्बु, भोजपुरलगायत पूर्वी जिल्लाबाट राजधानी काठमाडौँ जाँदै गरेका यात्रुहरु बाटो खुल्ने पर्खाइमा छन्।

प्रहरीका अनुसार निरन्तर वर्षाका कारण पहिरो पन्छाउन कठिन भइरहेको छ भने सडक खुलाउन प्रयास तीव्र पारिएको छ। अहिले डोजर तथा मानव संसाधन परिचालन गरी सडक सफा गर्ने कार्य अगाडि बढाइएको छ। वर्षा नरोकिएसम्म जोखिम अझ बढ्न सक्ने अनुमान गरिएको छ।