भक्तपुर, २९ असार । बागमती प्रदेश सरकारका स्वास्थ्य मन्त्री किरण थापाले भक्तपुर जिल्लालाई पूर्ण खोप सुनिश्चित जिल्ला घोषणा गर्नुभएकाे छ ।

शनिबार सूर्यविनायकमा खोप जिल्ला समन्वय समितिले आयोजना गरेको कार्यक्रममा मन्त्री थापाले भक्तपुरलाई पूर्ण खोप सुनिश्चितता तथा दिगोपनाको प्रमाणपत्र हस्तान्तरण गर्दै यसअघि जिल्लाका चार वटै स्थानीय तह पूर्ण खोप सुनिश्चित भइसकेको जानकारी दिनुभयाे ।

मन्त्री थापाले मुख्यमन्त्री स्वास्थ्य कार्यक्रमलाई अझ प्रभावकारी बनाउन घरघरमा स्वास्थ्यकर्मी र स्वयंसेवक परिचालन गरिने बताउँदै भन्नुभयो, “मुख्यमन्त्री स्वास्थ्य कार्यक्रम सोचे अनुसार प्रभावकारी हुन सकेन, त्यसैले नसर्ने रोग निवारणका लागि रोग पहिचान गर्ने उद्देश्यले स्वास्थ्यकर्मी र स्वयंसेवक परिचालन गरेर घरदैलोमै पुगेर स्वास्थ्य परीक्षण गर्नेछौं।

यसका लागि स्वयंसेवकहरुलाई पारिश्रमिक र एक हजार रुपैयाँ सञ्चार खर्चको व्यवस्था गरिएको छ।” उहाँले भक्तपुर अस्पताल र हेटौँडा अस्पताललाई टेलिमेडिसिन हब बनाएर २४ सै घण्टा सेवा संचालन गर्ने गरी प्रदेश स्वास्थ्य मन्त्रालयले व्यवस्था गरेको जानकारी गराउँदै प्रदेशस्तरीय अस्पतालको स्तरोन्नति, जनशक्ति वृद्धि र उपकरण वितरणलाई पनि प्रभावकारी रूपमा अगाडि बढाइएको बताउनुभयो।

स्वास्थ्य मन्त्री थापाले आगामी दिनमा भौतिक पूर्वाधार मन्त्रालय, खानेपानी मन्त्रालय, वन मन्त्रालय, कृषि मन्त्रालय लगायतका मन्त्रालयहरूसँग समन्वय गरेर स्वास्थ्यलाई जोड दिने योजना रहेको समेत जानकारी दिनुभयो। साथै प्रदेश सरकारले एमडी र एमबिबिएसको पढाइ पनि सुरु गरेको जानकारी गराउनुभयो। उनले अधूरा रहेका स्वास्थ्य चौकीका भवनहरु पूर्णता दिन बजेट व्यवस्थापन गरिएको पनि उल्लेख गर्नुभयो।

कार्यक्रममा बागमती प्रदेश स्वास्थ्य मन्त्रालयका सचिव डा. सुमित्रा गौतमले खोप सुनिश्चिततालाई दिगोपन बनाउनु चुनौतीपूर्ण रहेको बताउँदै भन्नुभयो, “कोही पनि खोपबाट छुट्न नहुने हाम्रो प्राथमिकता हो। खोप प्रभावकारी भएकाले बालमृत्युदर हरेक वर्ष घट्दै गएको छ। नियमित खोप कार्यक्रमले बालमृत्यु दर ८० प्रतिशतले घटाएको छ।”

कार्यक्रममा प्रदेशसभा सदस्य सुरेश श्रेष्ठ, धनेश्वरी प्रजापति, प्रमुख जिल्ला अधिकारी भरतमणि पाण्डे, खोप महाशाखा प्रमुख डा. अभियान गौतम लगायतले खोप कार्यक्रमलाई आगामी दिनमा अझ प्रभावकारी बनाउनुपर्ने आवश्यकता औंल्याउनुभयाे । 

जिल्ला जनस्वास्थ्य कार्यालय प्रमुख अञ्जना खड्काले घरघर पुगेर खोप सुनिश्चित गराई भक्तपुर जिल्लामा कोही पनि बालबालिका खोपबाट वञ्चित नभएको बताउनुभयाे । उहाँले आगामी दिनमा पनि खोप कार्यक्रमलाई प्रभावकारी बनाएर कोही पनि बालबालिका खोपबाट वञ्चित नहुने गरी दिगोपना दिने प्रतिबद्धता व्यक्त गर्नुभयाे । 

भक्तपुरका चारवटै नगरपालिकाका प्रतिनिधि र खोप सुनिश्चित घोषणामा सहयोग गर्ने विभिन्न निकायलाई सम्मान गरिएको थियो। स्वास्थ्य मन्त्री थापाले महिला स्वयंसेविकाहरुलाई समेत सम्मान गर्नुभएकाे थियाे ।  जिल्ला खोप समन्वय समितिका संयोजक एवं प्रमुख ईश्वर थापाले खोप सुनिश्चिततालाई दिगो बनाउने जिम्मेवारी सबै सरोकारवालाहरूको भएको उल्लेख गर्दै सबै निकायले सक्रिय भूमिका खेल्नुपर्नेमा जोड दिनुभयो।

यो घोषणाले भक्तपुर जिल्लामा खोप कार्यक्रमलाई थप प्रभावकारी बनाउने र नसर्ने रोग नियन्त्रणमा ठूलो प्रगति हासिल गर्ने लक्ष्यमा महत्वपूर्ण पाइला सावित हुनेछ भन्ने विश्वास व्यक्त गरिएको छ।

काठमाडौँ, २९ असार । विभिन्न भागमा आज हल्कादेखि मध्यम तथा केही स्थानमा भारी वर्षा हुने मौसम पूर्वानुमान महाशाखाले जनाएको छ। काठमाण्डौ उपत्यकासहित देशका केही स्थानमा बिहानैदेखि घाम लागे पनि गण्डकी प्रदेशका कास्की, तनहुँ, स्याङ्जालगायत स्थानमा हल्कादेखि मध्यम वर्षा भइरहेको छ।

दिउँसो कोशी, बागमती, गण्डकी र कर्णाली प्रदेशका एक/दुई ठाउँमा मेघगर्जन र चट्याङसहित ठूलो वर्षाको सम्भावना रहेको महाशाखाले जनाएको छ। अन्य प्रदेशमा भने हल्कादेखि मध्यम वर्षा हुन सक्नेछ।

आज राति पनि कोशी, मधेस, बागमती, गण्डकी, लुम्बिनी र सुदूरपश्चिम प्रदेशका केही ठाउँमा मेघगर्जनसहित वर्षाको सम्भावना रहेको छ।

त्यस्तै, रातिको समयमा कोशी र गण्डकी प्रदेशका एक/दुई स्थानमा भारी वर्षा हुन सक्ने उल्लेख गरिएको छ। मौसम पूर्वानुमान  महाशाखाले आवश्यक सतर्कता अपनाउन अनुरोध गरेको छ।

भक्तपुर, २५ असार । सुर्यविनायक नगरपालिकाको जामुनीमा अवस्थित सुर्यविनायक नगर अस्पताललाई बागमती प्रदेश सरकारले ५० शैयाको अस्पतालको रूपमा सञ्चालन गर्ने स्वीकृति प्रदान गरेको छ।

स्वास्थ्य मन्त्रालय अन्तर्गतको स्वास्थ्य निर्देशनालय, हेटौंडाबाट जारी गरिएको अनुमतिपत्रमा अस्पतालले स्वास्थ्य संस्था सञ्चालनसम्बन्धी सम्पूर्ण मापदण्डहरू पुरा गरेको उल्लेख गरिएको छ। स्वीकृतिपछि अब अस्पतालले थप सुविधा र सेवा विस्तार गर्न पाउनेछ।

स्वास्थ्य सेवा ऐन, २०७५ तथा नियमावली, २०७७ को दफा ८ (२) बमोजिम, स्वास्थ्य निर्देशनालयको प्राविधिक टोलीले गरेको निरीक्षण प्रतिवेदनको आधारमा अस्पताललाई २०८२ असार २४ गतेदेखि लागू हुने गरी आगामी दुई वर्षको लागि स्वास्थ्य संस्था सञ्चालन अनुमतिपत्र प्रदान गरिएको हो।

अनुमतिपत्रमा उल्लेख भएअनुसार, अस्पतालले आकस्मिक सेवा, शिशु सेवा, फिजियोथेरापी, तातो सेवा, उपचार सेवा, ल्याब, एक्सरे लगायतका सेवा उपलब्ध गराउनु पर्नेछ। साथै, वडास्तरमा ड्रेसिङ सेवा, काउन्सेलिङ सेवा पनि सन्चालन गर्नुपर्नेछ।

स्वास्थ्य मन्त्रालयका अधिकारीहरूका अनुसार यो निर्णयसँगै सुर्यविनायक नगरवासीहरूले थप गुणस्तरीय सेवा पाउनेछन्। अस्पतालको स्तरोन्नति स्वास्थ्य मन्त्री किरण थापा, सचिव डा. सुमित्रा गाैतमकाे विशेष पहलमा सम्भव भएको बताइएको छ।

स्थानीयवासी र जनप्रतिनिधिहरूले अस्पतालको स्तरोन्नति भएपछि नगरमै प्रभावकारी उपचार सेवा सहज हुने विश्वास व्यक्त गरेका छन्।

हेटौंडा । बागमती प्रदेश सरकारले आर्थिक वर्ष २०८२/८३ का लागि प्रस्तावित बजेट आजै पारित गर्ने तयारी गरेको छ । आइतबार बिहान ११ बजे बस्ने प्रदेशसभा बैठकमा मन्त्रालयगत छलफल, खर्च कटौती प्रस्तावहरू र मन्त्रीहरूको जवाफपछि बजेट पारित गरिने कार्यक्रम तय भएको छ ।

असार १२ यता पटक–पटक अवरोधमा परेको प्रदेशसभा शुक्रबार दिउँसो र शनिबार अबेर रातिसम्म चलेको थियो । शुक्रबार विनियोजन विधेयक प्रस्तुत भए पनि प्रतिपक्षले पूरक प्रस्ताव माग गरेपछि बैठक स्थगित भएको थियो ।

शनिबार दलहरूबीच सहमति जुटाउन प्रयास भए पनि निष्कर्ष ननिस्किएपछि साँझ सरकारले पूरक प्रस्ताव दर्ता गराएको थियो । त्यसपश्चात् बसेको बैठकमा उक्त प्रस्ताव र विनियोजन विधेयकमाथि छलफल सम्पन्न भएको थियो । छलफलपछि सभामुख भुवन कुमार पाठकले खर्च कटौतीको प्रस्ताव माग गर्दै बैठक आइतबार बिहान ११ बजेसम्मका लागि स्थगित गरेका थिए ।

यसैबीच, नेपाली कांग्रेस संसदीय दलले आफ्ना सांसदहरूलाई बैठकमा अनिवार्य उपस्थित भई पार्टी निर्देशन अनुसार मतदान गर्न निर्देशन दिँदै ह्विप जारी गरेको छ । प्रमुख सचेतक गोविन्द लम्सालले ह्विप कार्यान्वयनमा कुनै कमजोरी नहोस् भन्नेसमेत सांसदहरूलाई सचेत गराएका छन् ।

 

काठमाडौँ, २१ असार । मौसम पूर्वानुमान महाशाखाले जनाएको छ कि देशभर हाल मनसुनी वायुको प्रभाव जारी छ। मनसुनको न्यून चापीय रेखा सरदर स्थानको आसपास रहेको छ जसको कारण देशभर सामान्यतया बदली भएको छ।

कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानहरूमा चट्याङसहित हल्का देखि मध्यम वर्षा भइरहेको छ। आज दिउँसो पनि देशभर आंशिकदेखि सामान्यतया बदली रहनेछ।

कोशी, बागमती र गण्डकी प्रदेशका केही स्थानहरूमा, साथै बाँकी प्रदेशका थोरै ठाउँहरूमा चट्याङसहित हल्का देखि मध्यम वर्षाको सम्भावना छ। साथै, कोशी र बागमतीका पहाडी भूभागमा एक-दुई स्थानमा भारी वर्षा हुन सक्ने बताइएको छ।

आज राति कोशी, बागमती, गण्डकी र लुम्बिनी प्रदेशका धेरै स्थानहरूमा चट्याङसहित हल्का देखि मध्यम वर्षाको सम्भावना छ भने एक-दुई स्थानमा भारीदेखि धेरै भारी वर्षा हुने सम्भावना छ।

यसका कारण शहरी तथा तराई क्षेत्रहरूमा डुबानको जोखिम बढ्नेछ भने ठूला नदी नाला तथा खोलाहरूमा पानीको सतह वृद्धि हुने सम्भावना छ।

दैनिक जनजीवन, कृषि, स्वास्थ्य, पर्यटन, नदी किनाराका निर्माण कार्य, सडक तथा हवाई यातायात प्रभावित हुनसक्ने भएकाले मौसम पूर्वानुमान महाशाखाले आवश्यक सतर्कता अपनाउन आग्रह गरेको छ।

काठमाडौं, १७ असार । देशभर सामान्यतया मौसम सफा रहे पनि आज दिउँसो धेरै ठाउँमा वर्षाको सम्भावना रहेको मौसम पूर्वानुमान महाशाखाले जनाएको छ।

बिहान धेरै ठाउँमा घाम लागेको भए पनि दिउँसोपख मेघगर्जन र चट्याङसहित पानी पर्ने सम्भावना छ।महाशाखाका अनुसार आज कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका धेरै ठाउँमा हल्का देखि मध्यम वर्षा हुनेछ।

मधेस प्रदेशका केही ठाउँमा पनि वर्षा हुने अनुमान गरिएको छ। विशेषगरी पहाडी भू-भागका केही स्थानमा ठूलो पानी पर्ने सम्भावना रहेको छ। राति पनि मधेसबाहेकका अन्य प्रदेशहरूमा ठूलो वर्षा हुन सक्ने सम्भावना रहेको महाशाखाले जनाएको छ।

ग्वान्जाउ, चीन, १४ असार । ग्वान्जाउमा आयोजित २० औँ चाइना अन्तर्राष्ट्रिय साना तथा मझौला व्यवसाय (SME) व्यापार मेलामा नेपाली प्रतिनिधिमण्डलले सहभागिता जनाएका छन्। नेपालका विभिन्न साना तथा मझौला व्यवसाय, उद्योग, सेवा तथा उत्पादन क्षेत्रका व्यापारीहरूले आफ्नो उत्पादन र नवप्रवर्तन प्रस्तुत गरेका हुन ।

मेलामा बागमती प्रदेशका स्वास्थ्य मन्त्री किरण थापाकाे विशेष सहभागिता रहेकाे थियाे । मन्त्री थापाले मेलाको उद्घाटन सत्रमा नेपाली प्रतिनिधिमण्डलको नेतृत्व गर्दै बागमती प्रदेशमा स्वास्थ्य सेवा, औषधि उद्योग, मेडिकल उपकरण तथा सार्वजनिक–निजी साझेदारीका सम्भाव्य क्षेत्रबारे चिनियाँ प्रतिनिधिहरूसँग संवाद गर्नु भएकाे थियाे ।

उहाँले भन्नुभयाे, “नेपालको साना तथा मझौला उद्योगहरूमा लगानी गर्न चीनसँग सहकार्यको प्रशस्त सम्भावना छ।”

नेपाली व्यापारीहरूले मेलाबाट अन्तर्राष्ट्रिय बजारमा आफ्नो स्थान बनाउने प्रेरणा पाएको बताएका छन्। चीन सरकारद्वारा आयोजित यो मेला साना तथा मझौला उद्योगहरूबीच सहयोग, प्रविधि स्थानान्तरण र निर्यात प्रवर्द्धनको प्रभावकारी प्लेटफर्मका रूपमा हेरिएको छ।

भक्तपुर, ८ असार । बागमती प्रदेश सरकारको हालै प्रस्तुत बजेटमा भक्तपुर जिल्लाको स्वास्थ्य क्षेत्रले  प्राथमिकता पाएको छ। प्रदेश स्वास्थ्य मन्त्रालयको नेतृत्वमा रहेका स्वास्थ्य मन्त्री किरण थापा र स्वास्थ्य सचिव डा. सुमित्रा गौतम दुवै भक्तपुरका स्थानीय भएकाले बजेट विनियोजनमा भक्तपुरका विभिन्न स्वास्थ्य संस्थाहरूले प्राथमिकता पाएका हुन । 

प्रदेशकाे स्वास्थ्य क्षेत्रकाे बजेटमा  : चागुनारायण नगर अस्पतालका लागि रु. १ करोड, सूर्यविनायक नगर अस्पतालका लागि रु. २ करोड, कोरियन अस्पतालका लागि रु. १ करोड, दधिकोट प्राथमिक स्वास्थ्य केन्द्रका लागि रु. १ करोड ५० लाख, ख्वप अस्पतालका लागि रु. २ करोड, तथा अन्य स्वास्थ्य चौकिहरूमा समेत १ करोडभन्दा बढी बजेट विनियोजन गरिएको छ।

बजेटले भक्तपुरको स्वास्थ्य क्षेत्र आगामी वर्षमा गुणात्मक सुधारको दिशामा अग्रसर हुने अपेक्षा गरिएको छ। विगतमा पूर्वाधार, उपकरण र जनशक्ति अभावले थलिएको यस क्षेत्रले अब पर्याप्त स्रोत प्राप्त गर्ने भएपछि सेवाग्राही नागरिकको विश्वास बढ्ने संकेत देखिएको छ।

स्थानीय जनप्रतिनिधि, स्वास्थ्यकर्मी र सेवाग्राहीहरूले भक्तपुर जिल्ला प्रदेश सरकारको स्वास्थ्य नीति तथा बजेटको केन्द्रमा परेकोमा सन्तोष व्यक्त गरेका छन्। कतिपयले त यो अवस्थालाई “स्वास्थ्य फकडको युग सुरु हुने संकेत” समेत बताएका छन्।

बागमती प्रदेश सरकारले स्वास्थ्य सेवा पहुँचयोग्य, गुणस्तरीय र समावेशी बनाउने उद्देश्यले प्रदेशभित्रका १३ वटै जिल्लामा समानताको आधारमा बजेट वितरण गर्ने नीति लिएको भए तापनि भक्तपुरमा परेको बजेट औसतभन्दा माथि देखिएको छ।