काठमाडौं, ७ कात्तिक । भारतको हैदराबादबाट बेंगलुरु जाँदै गरेको यात्रुवाहक बसमा आगलागी हुँदा कम्तीमा १० जनाको मृत्यु भएको छ । दक्षिण भारतको आन्ध्र प्रदेश राज्यको कर्नुल जिल्लामा पर्ने निचन्ना टेकरू गाउँ नजिक शुक्रबार बिहान उक्त बसमा आगो लागेको भारतीय सञ्चार माध्यमहरूले जनाएका छन् । बसमा ४२ जना यात्रु सवार थिए ।

घटनामा १० जनाको मृत्यु पुष्टि भएको छ भने धेरै यात्रु गम्भीर घाइते भएको बताइएको छ । घाइतेमध्ये केहीको अवस्था गम्भीर भएकाले मृतकको संख्या अझै बढ्न सक्ने आशंका गरिएको छ ।  आगोले बस पूर्णरूपमा जलेर क्षतिग्रस्त भएको छ ।

प्रारम्भिक जानकारी अनुसार, एउटा मोटरसाइकल बससँग ठोक्किएपछि आगलागी भएको हुनसक्ने अनुमान गरिएको छ । तर स्थानीय प्रशासनले भने दुर्घटनाको कारण आधिकारिक रूपमा पुष्टि गरेको छैन ।

रुपन्देही, १८ असाेज । धनगढीबाट काठमाडौँ जाँदै गरेको यात्रुवाहक बस कपिलवस्तुको वनकसवासामा दुर्घटना हुँदा ३६ जना घाइते भएका छन्।

ना ८ ख ५७०३ नम्बरको उक्त बस शनिबार बिहान करिब साढे ५ बजे सडक छेउमा पल्टिँदा दुर्घटना भएको हो। प्रहरीका अनुसार, दुर्घटनामा परेकामध्ये २ जना गम्भीर घाइते छन्।

घाइतेमध्ये १६ जनालाई थप उपचारका लागि बुटवलस्थित प्रादेशिक अस्पतालमा रिफर गरिएको छ भने बाँकी २० जनाको उपचार चन्द्रौटास्थित सञ्जीवनी सामुदायिक अस्पतालमा भइरहेको वडा प्रहरी कार्यालय चन्द्रौटाले जनाएको छ।

दुर्घटनाको कारणबारे अनुसन्धान भइरहेको प्रहरीले बताएको छ। स्थानीयवासी र सुरक्षाकर्मीहरूले घाइतेहरूलाई तत्काल उद्धार गरी अस्पताल पुर्‍याएका थिए।

कपिलवस्तु, २९ असार । काठमाडौंबाट दाङ जाँदै गरेको यात्रुबाहक बस कपिलवस्तुमा दुर्घटना हुँदा २९ जना यात्रु घाइते भएका छन्। दुर्घटनामा परेकामध्ये तीन जनाको अवस्था गम्भीर रहेको छ।

जिल्ला ट्राफिक कार्यालय कपिलवस्तुका प्रहरी निरीक्षक पंकज चुदांलीका अनुसार लु.प्र ०२००१ ख ००४५ नम्बरको बस चन्द्रौटा र गोरुसिङ्गेको सिमानामा पर्ने बेल नदी नजिकै आइतबार बिहान दुर्घटनामा परेको हो।

गम्भीर घाइते भएकालाई थप उपचारका लागि बुटवल पठाइएको छ भने अन्य २६ जना सामान्य घाइतेहरूको चन्द्रौटास्थित सञ्जिवनी सामुदायिक अस्पतालमा उपचार भइरहेको छ। दुर्घटनाको कारण भने अझै खुल्न सकेको छैन। प्रहरीले घटनाबारे थप अनुसन्धान गरिरहेको जनाएको छ।