काठमाडौँ, माङ  १० । भारी हिमपातका कारण सुदूरपश्चिम प्रदेशका पहाडी जिल्लाका राजमार्ग अवरुद्ध भएका छन्। बैतडीको नारखोली, खोडपे, श्रीभावर, सतबाँझ र देहिमाडौँ क्षेत्रमा हिमपात भएपछि दशरथचन्द राजमार्ग र जयपृथ्वी राजमार्ग गए रातिदेखि नै अवरुद्ध रहेका हुन्।

रातिदेखि नै राजमार्ग अवरुद्ध हुँदा सवारी आवागमन पूर्ण रूपमा ठप्प रहेको बैतडीका प्रहरी प्रवक्ता तथा प्रहरी निरीक्षक सुरज सिंहले जानकारी दिए। उनका अनुसार हिमपातका कारण राजमार्गसँगै विद्युत् सेवा पनि अवरुद्ध भएको छ। उनले भने, “रातिको भारी हिमपातले राजमार्ग र विद्युत् सेवा ठप्प भएको छ। पुनः सञ्चालनका लागि सम्बन्धित निकायसँग समन्वय गरेर पहल थालिएको छ।”

यस्तै डडेल्धुराको साहुखर्क, हगुल्टेललगायतका क्षेत्रमा पनि हिमपात हुँदा भीमदत्त राजमार्ग अवरुद्ध भएको प्रहरीले जनाएको छ। शुक्रबार बेलुकादेखि नै बैतडीसहित दार्चुला, बझाङ, डोटी र डडेल्धुराका उच्च लेकाली भेगमा वर्षासँगै हिमपात भएको हो। यो वर्ष पहिलोपटक हिउँदे वर्षा र हिमपात भएपछि किसानहरू भने खुसी भएका छन्।

विगत चार महिनादेखि पर्याप्त वर्षा नहुँदा हिउँदे बाली सुक्ने अवस्थामा पुगेको थियो। अहिले हिमपात र वर्षा भएपछि बाली सप्रिने आशामा किसान उत्साहित भएका छन्। यद्यपि हिमपातका कारण अत्यधिक चिसो बढेपछि जनजीवन भने प्रभावित भएको छ।

काठमाडौँ, २५ साउन । मनसुनको न्यून चापीय रेखा सरदर स्थानको आसपास अवस्थित छ। यसले गर्दा देशभर सामान्यतया बदली रहेको छ।

कोशी प्रदेश, बागमती प्रदेश, गण्डकी प्रदेश, लुम्बिनी प्रदेश र सुदूरपश्चिम प्रदेशका थोरै स्थानहरूमा तथा मधेस प्रदेश र कर्णाली प्रदेशका पहाडी भू-भागका एक-दुई स्थानमा मध्यम वर्षा भइरहेको छ।

आज बिहानको मापनअनुसार कोशी, नारायणी, बागमती, कर्णाली, महाकाली, कन्काई, कमला, पूर्वी राप्ती, पश्चिम राप्ती र बबई नदीहरूको बहाव सतर्कता तहभन्दा तल रहेको बाढी पूर्वानुमान महाशाखाले जनाएको छ।

आइतबार पाँचथर, झापा, इलाम, लमजुङ र आसपासका जिल्लाहरूमा बग्ने स-साना नदीहरूको बहाव उल्लेख्य रूपमा बढ्ने र आकस्मिक बाढीको मध्यम जोखिमको उच्च सम्भावना रहेको पूर्वानुमान छ।

साथै, ताप्लेजुङ, तेह्रथुम, धनकुटा, सङ्खुवासभा, भोजपुर, ओखलढुङ्गा, सोलुखुम्बु, दोलखा, सिन्धुपाल्चोक, काभ्रेपलान्चोक, काठमाडौँ, ललितपुर, भक्तपुर, धादिङ, नुवाकोट, रसुवा, रोल्पा, अछाम, बझाङ, डडेलधुरा, डोटी र आसपासका जिल्लाहरूमा बग्ने स-साना नदीहरूको बहाव उल्लेख्य रूपमा बढ्ने र आकस्मिक बाढीको मध्यम जोखिमको मध्यम सम्भावना रहेको छ।

धनगढी, २४ असार । सुदूरपश्चिमका विभिन्न जिल्ला लगातारको वर्षाले प्रभावित छन्। जल तथा मौसम विज्ञान विभागले बाढी, पहिरो र डुबानको उच्च जोखिम रहेको जनाएको छ।

जल तथा मौसम विज्ञान विभागका अनुसार बैतडीको गोठलापानी, सिद्धपुर, दार्चुलाको गोकुले क्षेत्र, डडेलधुराको साहुखर्क, डोटीको पश्चिम सेती, दीपायल र झिंग्राना, बझाङको कालुखेती र अछामका धेरै ठाउँमा निरन्तर वर्षा भइरहेको छ।

त्यस्तै, कैलालीको लम्की, टीकापुर र कञ्चनपुरको दोधारा चाँदनी क्षेत्रमा पनि भारी वर्षा जारी रहेको छ। विभागले पहाडी तथा तराई दुबै भू-भागमा सतर्कता अपनाउन आग्रह गरेको छ।

ठूला खोलानालामा पानीको बहाव बढिरहेको र कतिपय क्षेत्रमा डुबान सुरु भइसकेको विज्ञहरूले जनाएका छन्। नदी किनार र पहिरो सम्भावित स्थानमा नजान अनुरोध, स्थानीय तहलाई सतर्कता र उद्धार तयारीमा रहन सुझाव,  संचार र यातायात प्रणालीमा अवरोधको सम्भावना रहेकाे छ ।

सुदूरपश्चिमका बासिन्दालाई सावधानी अपनाउन तथा जोखिमयुक्त स्थानबाट सुरक्षित स्थानमा सर्न विभागले अपिल गरेको छ।

म्याग्दी, १८ असार । धौलागिरि गाउँपालिका–३ मुना फलीयागाउँ र दर जोड्ने दरखोलामाथि रु दुई करोड ३१ लाख ३६ हजार ७५० को लागतमा ३६६ मिटर लामो झोलुङ्गे पुल निर्माण भएको छ ।

पोखरास्थित स्थानीय पूर्वाधार विकास आयोजनाले पुुल निर्माण गरेको हो । पुल बनेपछि धौलागिरि चक्रीय पदमार्गमा जाने पर्यटकलाई सहज भएको छ । साथै दर, मुदी, खिवाङ, नेरवाङ, बगर, नाउराका बासिन्दा लामो बाटो भएर गाउँपालिकाको केन्द्र मुना पुग्नुपर्ने बाध्यताबाट मुक्त भएका छन् ।

विसं २०८२ को मङ्सिरसम्ममा पूरा गर्नेगरी सम्झौता भएकामा निर्माण कम्पनीले हाले काम पूरा गरेर पूर्वाधार कार्यालयलाई हस्तान्तरण गरेसँगै पुल सञ्चालनमा आएको हो । रासस