नवलपरासी । नवलपरासी (बर्दघाट–सुस्ता पूर्व) को कावासोती नगरपालिका–१६ डण्डा बजारमा भएको मोटरसाइकल दुर्घटनामा चालकको मृत्यु भएको छ भने पछाडि बसेका दुई युवती गम्भीर रूपमा घाइते भएका छन् ।

शुक्रबार राति करिब १० बजे डण्डाबाट कावासोतीतर्फ जाँदै गरेको ना ४३ प ३४३६ नम्बरको मोटरसाइकललाई नम्बर नखुलेको अर्को सवारीसाधनले ठक्कर दिएको जिल्ला प्रहरी कार्यालयका प्रहरी नायब उपरीक्षक (डीएसपी) मधु नेपालले जानकारी दिए ।

दुर्घटनामा गम्भीर घाइते भएका मोटरसाइकल चालक ४२ वर्षीय हीराबहादुर परियारको उपचारको क्रममा मृत्यु भएको प्रहरीले जनाएको छ । उनी कावासोती नगरपालिका – १६ गैडाचोकका बासिन्दा हुन् । घाइते दुवैजना – ३२ वर्षीया सुनिता जोहार्जा (कावासोती – ३) र २४ वर्षीया मीना मगर (कावासोती – १४) लाई मध्यविन्दु प्रादेशिक अस्पताल डण्डामा उपचार भइरहेको छ ।

ठक्कर दिएर फरार भएको सवारीसाधनको खोजी तथा आवश्यक छानबिन जारी रहेको डीएसपी नेपालले बताए ।