नेपालगन्ज, २६ बैशाख । बाँकेमा प्रहरीले स्रोत नखुलेको ६ लाख भारतीय रुपैयाँसहित दुई जनालाई पक्राउ गरेको छ ।

जिल्ला प्रहरी कार्यालय बाँकेका प्रहरी नायब उपरीक्षक दीपक पातलीका अनुसार नरैनापुर गाउँपालिकातर्फ जाँदै गरेका उनीहरूलाई विशेष सूचनाका आधारमा अटो रिक्सामा जाँच गरिएको थियो । जाँचका क्रममा अवैध भारतीय ५०० र १००० दरका नोट बरामद भएपछि प्रहरीले दुवै जनालाई नियन्त्रणमा लिएको हो ।

पक्राउ पर्नेमा नरैनापुर गाउँपालिका–५ का २९ वर्षीय वीरवल कुम्हार र नरैनापुर गाउँपालिका–४ का ३८ वर्षीय मुनिव खाँ रहेका छन् । उनीहरूलाई नेपालगन्ज उपमहानगरपालिका–२ स्थित एकलैनी क्षेत्रबाट पक्राउ गरिएको प्रहरीले जनाएको छ ।

बरामद गरिएको रकम आन्तरिक राजस्व कार्यालय, कोहलपुरमा बुझाइएको छ । पक्राउ परेका दुवै जनामाथि थप अनुसन्धान भइरहेको जिल्ला प्रहरी कार्यालय, बाँकेले जनाएको छ ।

बाँके, २२ बैशाख । सामाजिक सञ्जाल टिकटक मा हतियारसहितका भिडियो पोस्ट गरी समाजमा डर र त्रास फैलाएको आरोपमा बाँके प्रहरीले दुई जनालाई पक्राउ गरेको छ।

पक्राउ पर्नेहरूमा नेपालगञ्ज उपमहानगरपालिका–४ का ३० वर्षीय अजय कुमाल र डुडुवा गाउँपालिका–४ का २६ वर्षीय अनिल खटिक रहेका छन्। उनीहरूले आफ्नो टिकटक आईडीमार्फत हातमा हतियार समातेको तथा सर्वसाधारणलाई आतंकित पार्ने खालका गतिविधि देखाउने भिडियोहरू सार्वजनिक गरेको प्रहरीले जनाएको छ।

जिल्ला प्रहरी कार्यालय बाँकेका अनुसार अजय कुमालले ‘अजय मगर’ र अनिल खटिकले ‘अनिल सोनखर’ नामका टिकटक आईडी प्रयोग गरेका थिए। यस्ता सामग्रीले आम जनमानसमा असुरक्षाको भावना पैदा गरेको भन्दै प्रहरी निगरानीपछि उनीहरूलाई पक्राउ गरिएको हो।

प्रहरीले सार्वजनिक शान्ति र सुरक्षामा खलल पुर्‍याउने यस्ता गतिविधिलाई गम्भीर रूपमा लिएको जनाएको छ। बाँके प्रहरीका सूचना अधिकारी प्रहरी नायब उपरीक्षक दीपक पातलीका अनुसार पक्राउ परेका दुवै जनालाई मुद्दा हेर्ने अधिकारीसमक्ष उपस्थित गराई म्याद थप गरेर थप अनुसन्धान भइरहेको छ।