- ९ भाद्र २०८३, मंगलवार / Aug 25, 2026
काठमाडाैं, ८ असार । मौसम पूर्वानुमान महाशाखाका अनुसार हाल देशभर मनसुनी वायु सक्रिय रहेको छ। दिउँसो बागमती, गण्डकी, लुम्बिनी र कोशी प्रदेशका पहाडी भूभागमा चट्याङसहित हल्का देखि मध्यम वर्षा हुने सम्भावना छ भने केही स्थानमा भारी वर्षा पनि हुनसक्ने अनुमान गरिएको छ।
कोशी, बागमती, गण्डकी र लुम्बिनी प्रदेशका केही स्थानहरूमा भारी वर्षाको सम्भावनाका कारण नदीको जल सतह वृद्धि, बाढी, पहिरो, भूक्षय लगायतका प्राकृतिक प्रकोप हुनसक्ने भएकाले सतर्कता अपनाउन मौसम पूर्वानुमान महाशाखाले आग्रह गरेको छ।
आज राति देशभर आंशिकदेखि साधारण बदली रहनेछ। उच्चपहाडी र हिमाली क्षेत्रका थोरै स्थानमा हल्का वर्षासहित हिमपातको सम्भावना पनि रहेको छ। मौसम पूर्वानुमान महाशाखाले जनता तथा सम्बन्धित निकायलाई आवश्यक सतर्कता अपनाउन निर्देशन दिएको छ।
गण्डकी, ८ असार। लमजुङको मर्स्याङ्दी गाउँपालिकास्थित धार्मिक महत्त्वको पर्यटकीय तीर्थस्थल दूधपोखरीकुण्डमा जल सतह घट्दै गएपछि स्थानीय चिन्तित भएका छन् । विगतमा भरिभराउ रहने दूधपोखरीकुण्ड पछिल्लो समय जल सतह घट्दै गएपछि यहाँको सौन्दर्यमा चुनौती थपिएको सरोकार भएकाहरूले बताएका हुन् ।
पथप्रदर्शक गङ्गा घलेले जल सतह घट्दै जाँदा यहाँको सौन्दर्यमा चुनौती बढाएको भन्दै यहाँको धार्मिक पर्यटनमा यसले नकारात्मक असर पार्ने देखिएको बताए । पर्यटकीय गन्तव्य दूधपोखरीमा स्नान गरेमा पुण्य प्राप्त हुने जनविश्वासका कारण टाढा टाढाबाट दर्शनार्थी पुग्ने गरेका उनको भनाइ छ । समुद्री सतहबाट चार हजार ६०० मिटर उचाइमा रहेको यो तीर्थस्थललाई देवादिदेव महादेवको बासस्थानका रूपमा लिने गरिन्छ ।
प्रत्येक वर्षको जनैपूर्णिमामा विशेष मेला लाग्ने यो कुण्डको जल सतह पछिल्ला वर्षमा घट्दै गएको घलेले जानकारी दिए। “जनैपूर्णिमाको दिन कुण्डमा गरिने स्नानको विशेष महत्त्व छ, उक्त दिन यहाँ पितृलाई दिइने तर्पणले पितृमोक्ष हुने विश्वास छ”, उनले भने ।
विसं २०४४ देखि हालसम्म २३औँ पटकसम्म दूधपोखरीकुण्डमा पुगेको अनुभव सुनाउँदै घलेले हालको अवस्था हेर्दा करिब ५० प्रतिशतको हाराहारीमा जल सतह घटेको बताए । “सुरुमा यहाँ पुग्दा देखेको जल सतह अहिले ५० प्रतिशतले घटेको छ”, उनले भने, “कुण्डको उत्तरतर्फबाट हिउँ पहिरोका कारण कुण्ड पुरिने जोखिम छ भने बर्सेनि तापमान वृद्धिको असर कुण्डमा परिरहेको देखिन्छ ।”
तापमान वृद्धिका कारण कुण्ड वरपरका हिमालमा हिउँ पर्ने क्रम घट्दै जानु, कुण्डको पिँधबाट पानी बगिरहनेलगायत कारणले जल सतह घट्दै गएको पथप्रदर्शक घलेले बताए । लमजुङ गोरखा, तनहुँ, कास्की, चितवन, काठमाडौँलगायत देशका विभिन्न स्थानबाट यस कुण्डमा स्नान गर्न धार्मिक भक्तजन आउँछन् ।
कास्कीको सिक्लेस, ताङतिङ, लमजुङको घलेगाउँ, घनपोखरालगायत स्थानबाट तीन दिनसम्म पदयात्राका माध्यमबाट यस कुण्डमा दर्शनार्थी पुग्ने गरेका पथप्रदर्शक घलेले उल्लेख गरे । यस कुण्डमा स्नान गर्ने व्यक्तिलाई भारतको काशी जान नपर्ने जनविश्वासले रहिआएको उनको भनाइ छ ।
मनास्लु र हिमालचुली हिमालको काखमा रहेको यो धार्मिक स्थललाई पदयात्रा पर्यटनसँग जोड्ने लक्ष्यका साथ गुरुङ सम्पदा पदमार्गमा समेट्दै प्रवर्द्धन र विकासका काम अघि बढाइएको गुरुङ पर्यटन व्यवसायी सङ्घ गण्डकी प्रदेशका संस्थापक अध्यक्ष एवं गुरुङ सम्पदा पदमार्गका संयोजक बोबरजङग गुरुङले बताए ।
उच्च हिमाली क्षेत्रका साथै मानव बस्तीबाट टाढा रहेको यस तीर्थस्थल पुग्ने प्राचीन भेँडीगोठ, नून बोक्न जाने प्राचीन मार्गलाई सम्पदा पदमार्गका रूपमा अघि बढाउँदै पदयात्रा पर्यटन प्रवर्द्धनमा जोड दिइएको उनले उल्लेख गरे । सङ्घको आयोजनामा पहिलो चरणमा कास्कीको ताङतिङबाट दूधपोखरी हुँदै मनाङको तिमाङसम्म अन्वेषणात्मक पदयात्रा गरिएको थियो । त्यस्तै दोस्रो चरणमा कास्कीको सिक्लेस हुँदै कफुचे हिमताल, कोरी, क्होलासोँथर, कपुँडाँडा हुँदै याङ्जाकोटसम्म खोज तथा प्रवर्द्धनात्मक पदयात्रा गरिएको थियो ।
तेस्रो चरणअन्तर्गत हालै लमजुङको सिङ्दी, पसगाउँ, भुजुङ, घनपोखराबाट दूधपोखरी हुँदै सिउरुङसम्मको खोज तथा प्रवर्द्धनात्मक पदयात्रा सम्पन्न गरिसकिएको सङ्घका अध्यक्ष किसमकुमारी गुरुङले जानकारी दिए । उनका अनुसार सन् २०२६ देखि यस गुरुङ सम्पदा पदमार्गलाई सञ्चालनमा ल्याउने तयारी भइरहेको छ ।धार्मिक एवं पर्यटकीय महत्त्व रहेको दूधपोखरीकुण्डको जल सतह घट्दै गएकामा सम्बद्ध निकायले समयमा समस्या पहिचान गरी समाधान खोज्नुपर्ने जरुरी रहेको पथप्रदर्शक विकास गुरुङले बताए ।
“दूधपोखरीकुण्डको महत्त्वलाई जीवन्त राख्न, यसको संरक्षण र प्रवर्द्धन गर्नु जरुरी छ”, उनले भने, “यस तीर्थस्थलको धार्मिक पर्यटकीय महत्त्वलाई प्रचारप्रसार गर्दै कुण्डको संरक्षणसहित यहाँ पुग्ने पदमार्गको अत्यावश्यकीय पूर्वाधार विकास गर्नु जरुरी छ ।” रासस
काठमाडाैं, ६ जेठ । जल तथा मौसम पूर्वानुमान महाशाखाका अनुसार देशको पश्चिमी क्षेत्रमा सक्रिय मौसमी प्रणालीका कारण आगामी ४–५ दिनसम्म लगातार भारी वर्षा हुने सम्भावना छ।
हाल लुम्बिनी, गण्डकी, कर्णाली र सुदूरपश्चिम प्रदेशका धेरै ठाउँमा वर्षा भइरहेको छ भने कोशी, मधेस, बागमती र गण्डकी प्रदेशका केही भूभागमा पनि मनसुनी वायु सक्रिय रहेको छ।
भारतको पश्चिम बङ्गाल नजिक बनेको न्यूनचापीय प्रणालीले पनि देशभर आकाश ढाकिएको छ। आज र भोलि कोशी, बागमती, गण्डकी तथा लुम्बिनी प्रदेशका एक/दुई स्थानमा ठूलो पानी पर्नसक्ने जनाइएको छ।
साथै कोशी र मधेस प्रदेशमा चट्याङसहितको हावाहुरी वर्षाको सम्भावना रहेकोले सतर्कता अपनाउन मौसमविद्ले आग्रह गरेका छन्।
काठमाडौं, २ असार । सामाजिक सञ्जाल फेसबुकमा सुसाइड नोट लेख्दै सम्पर्कविहीन बनेका डा. केशव श्रेष्ठलाई प्रहरीले काठमाडौंको तार्केश्वर नगरपालिका–३ स्थित श्रीनाथ बुटिक रिसोर्टबाट सकुशल फेला पारेको छ। उनी केही दिनअघि मात्रै रामेछाप अस्पतालबाट सरुवा भएका थिए।
सरुवा भएपछि फेसबुकमा आत्महत्या संकेतपूर्ण स्टाटस लेख्दै सम्पर्कविहीन बनेका डा. श्रेष्ठको खोजी बागमती प्रदेश स्वास्थ्य मन्त्री किरण थापा तथा मन्त्रालयकाे पहलकदमका कारण प्रहरीले प्राथमिकताका साथ खाेजी गर्दा सकुशल नियन्त्रणमा लिएकाे हाे ।
प्रहरीले फेला पार्दा डा. श्रेष्ठले “मर्न आएको थिएँ” भनेर प्रतिक्रिया दिएका थिए। प्रहरी स्रोतका अनुसार, उनी डोरी खोजिरहेका बेला फेला परेका थिए। तत्काल उनलाई नियन्त्रणमा लिइएर मानसिक अवस्था मूल्याङ्कन गर्न अस्पताल पुर्याइएको छ।
सरुवाको कारण कर्मचारीबीचको द्वन्द्व
बागमती प्रदेश स्वास्थ्य मन्त्रालयका प्रवक्ता तथा महाशाखा प्रमुख डा. खगेश्वर गेलालका अनुसार, डा. श्रेष्ठको सरुवा उनको कार्यक्षमता कमजोर भएर नभई अस्पतालभित्रको आन्तरिक तनावलाई व्यवस्थापन गर्न गरिएको थियो । उनका अनुसार अस्पतालका केही डाक्टरहरूले नै मन्त्रालयमा लिखित रूपमा उजुरी दिएका थिए भने रामेछाप नगरपालिकाका जनप्रतिनिधिहरूले समेत डेलिगेसनसहित मन्त्रालयमा उपस्थित भएर समस्या समाधानको माग गरेका थिए।
“डा. श्रेष्ठको कार्यक्षमता राम्रो नै थियो। तर अस्पतालमा डाक्टर र अन्य स्टाफबीचको वेमेल, कतिपयलाई आवास छोड्न बाध्य बनाउनेजस्ता व्यवहारका कारण स्थिति जटिल बन्दै गएकाले असमझदारी चर्किनु अघि सरुवा गरिएको हो।” प्रवक्ता डा. गेलाले भने ।
नगर प्रमुखको भनाइ : महिला डाक्टरहरूकाे डेलिगेशन
रामेछाप नगरपालिकाका मेयर लवश्री न्यौपानेले अस्पतालका महिला चिकित्सकहरू आफू कहाँ डेलिगेसनसहित पुगेको र उनीहरूले मन्त्रालयसम्म गुनासो पुर्याएको बताए। मेयर न्यौपाने भन्छन्: “हामीले मन्त्रालयलाई अवगत गराइसकेका थियौं। महिला डाक्टर, नर्सहरू सबै आएर क्वाटरबाट राति निकालिएको कुरा भनेका थिए। मन्त्रालयले के गर्ने भन्ने सोध्दा मैले ‘तपाईंहरूकै अधिकार हो’ भनेको हुँ।”
प्रमुख जिल्ला अधिकारी अनविज्ञ
रामेछापका प्रमुख जिल्ला अधिकारी श्याम थापाले आफू जिल्लामा आएको ४० दिन मात्र भएको र अस्पतालको विवादबारे पहिलेदेखि जानकारी नभएको बताए।“आज बिहान डाक्टरको फेसबुक स्टाटस देखेपछि मात्रै घटनाबारे थाहा भयो,” उनले प्रतिक्रिया दिए।
मन्त्रालयमा परेका उजुरीहरू
काठमाडौँ, २२ जेठ । देशका विभिन्न स्थानहरूमा बिहानैदेखि हल्का वर्षा भइरहेको छ। कोशी, बागमती र गण्डकी प्रदेशका केही स्थानहरूमा मेघगर्जन र चट्याङसहित हल्का देखि मध्यम वर्षा भइरहेको छ।
जल तथा मौसम पूर्वानुमान महाशाखाका अनुसार भोजपुर, धनकुटा, झापा, मकवानपुर, सिन्धुपाल्चोक, कास्की, मनाङ, बागलुङ लगायतका जिल्लाका केही ठाउँमा पानी परेको छ।
देशको पश्चिम र मध्य भूभागमा पश्चिमी वायु र स्थानीय वायुको प्रभाव रहेको छ भने कोशी प्रदेशका धेरै ठाउँमा मनसुनी वायु सक्रिय रहेको छ। आज देशभर आंशिकदेखि सामान्यतया बदली रहनेछ। कोशी, बागमती, गण्डकी र कर्णाली प्रदेशका पहाडी भूभागका थोरै ठाउँहरूमा मेघगर्जन र चट्याङसहित हल्का देखि मध्यम वर्षाको सम्भावना रहेको मौसमविदहरूले बताएका छन्।
तर ठूलो पानी पर्ने सम्भावना भने कम रहेको छ। मौसमविद् विनोद पोख्रेलका अनुसार, भोलिदेखि तीन चार दिनसम्म पानी नपर्ने र मौसम सुख्खा हुने अनुमान गरिएको छ।
काठमाडाैं, २ जेठ । जल तथा मौसम पूर्वानुमान महाशाखाले हाल देशमा पश्चिमी वायु, स्थानीय वायु, बङ्गालको खाडी र अरब सागरबाट आएको जलवाष्पयुक्त हावाको प्रभाव रहेको जनाएको छ। यसले कोशी, मधेस, बागमती र गण्डकी प्रदेशमा चट्याङसहित हल्का वर्षा भइरहेको छ।
चट्याङसहितको वर्षाले दैनिक जनजीवन, कृषि, स्वास्थ्य, सडक र हवाई यातायातमा असर पर्न सक्ने भएकाले महाशाखाले सतर्कता अपनाउन अनुरोध गरेको छ।
हेटौँडा, २८ चैत । बागमती प्रदेशका स्वास्थ्य मन्त्री किरण थापाले ललितपुरको कोन्ज्योसोम गाउँपालिकामा निर्मित शंखु अस्पतालको भवन उद्घाटन गर्नुभएको छ। उद्घाटन समारोहमा बोल्दै मन्त्री थापाले अस्पतालका लागि जग्गा दान गर्ने दातालाई धन्यवाद दिँदै स्थानीय जनप्रतिनिधिको मेहनतको प्रशंसा गर्नुभयो ।
उहाँले प्रदेशका अधिकांश पालिकामा आधारभूत अस्पताल स्थापना भइसकेको बताउँदै अब मेडिकल सामग्री र जनशक्ति व्यवस्थापनमा जोड दिनुपर्ने कुरा औँल्याउनुभयो। “भवन मात्र भएर पुग्दैन, चिकित्सक, कर्मचारी, उपकरण र सेवा प्रणाली पनि सँगै चाहिन्छ,” उहाँले भन्नुभयो।
कोभिड–१९ महामारीका बेला तत्कालीन प्रधानमन्त्री केपी शर्मा ओलीको नेतृत्वमा सुरु भएको अस्पताल स्थापना अभियानलाई निरन्तरता दिँदै मन्त्री थापाले स्वास्थ्य सेवामा संघ, प्रदेश र स्थानीय तहको सहकार्य आवश्यक रहेको बताउनुभयो । “पालिकाहरूबाट चिकित्सक, स्टाफ नर्स र उपकरणको माग भइरहेको छ। यसलाई सम्बोधन गर्न प्रदेश सरकारले ११९ अस्पताललाई सहयोग गर्ने योजना बनाएको बताउनु भयाे ।
मन्त्री थापाले सबै सुविधा तत्काल उपलब्ध नभए पनि टेलिमेडिसिन सेवामार्फत दुर्गम क्षेत्रमा स्वास्थ्य सेवा विस्तार गर्ने योजनामा सरकार अघि बढेको जानकारी दिनुभयो। समारोहमा सहभागी जनप्रतिनिधिहरूले स्थानीय तहको प्रयासलाई बलियो बनाउन प्रदेश सरकारको थप सहयोग जरुरी रहेको बताए। मन्त्री थापाले स्वास्थ्य सेवालाई गुणस्तरीय र पहुँचयोग्य बनाउन निकट भविष्यमा थप कार्यक्रम ल्याइने प्रतिबद्धता जनाउनुभयो ।
अस्पताल निर्माणका लागि स्थानीय विष्णुमाया बोम्जनले ३ रोपनी जग्गा दान गर्नुभएको थियो भने २ रोपनी जग्गा मरिचमान र किशोर बोम्जनबाट १६ लाखमा खरिद गरिएको थियो। ६ रोपनी क्षेत्रमा बनेको यो अस्पतालको निर्माण २०७८ भदौ २३ मा १३ करोड ८१ लाखको सम्झौतापछि सुरु भएको थियो । अस्पताल सञ्चालनमा आएपछि कोन्ज्योसोम, महाङ्कालको बुखेल र वाग्मतीको इकुडोल क्षेत्रका बासिन्दालाई प्रत्यक्ष लाभ पुग्ने गाउँपालिका अध्यक्ष कृष्णमान लामाले बताउनुभयो ।
अध्यक्ष लामाको नेतृत्वमा भएको कार्यक्रममा नेकपा एमाले बागमती प्रदेश संसदीय दलका प्रमुख सचेतक मधुसूदन पौडेल, प्रदेश सभा सदस्य उर्मिला कुमारी लामा र जिल्ला जनस्वास्थ्य प्रमुख डा. भुवन पौडेलको उपस्थिति थियो ।