- ३० श्रावण २०८३, शनिबार / Aug 15, 2026
काठमाडौं, ८ पुस । तराईका विभिन्न जिल्लामा लगातारको हस्सु र शीतलहरका कारण चिसो अत्यधिक बढेपछि स्थानीय तहहरूले विद्यालयहरू बन्द गर्न थालेका छन्।
विगत चार दिनदेखि निरन्तर बढेको चिसोका कारण विद्यार्थीको स्वास्थ्यमा पर्न सक्ने प्रतिकूल असरलाई मध्यनजर गर्दै पर्सा, बारा, रौतहट र महोत्तरीका विभिन्न स्थानीय तहहरूले जाडो बिदा घोषणा गरेका हुन्।
पर्साको वीरगञ्ज महानगरपालिकाले सोमबारदेखि बुधबारसम्म तीन दिनका लागि सामुदायिक तथा संस्थागत सबै विद्यालयमा पठन–पाठन बन्द गर्ने निर्णय गरेको छ। यसैगरी पोखरिया नगरपालिका तथा पकहामैनपुर र छिपहरमाई गाउँपालिकाले पनि चिसोका कारण भोलिसम्म विद्यालय बन्द गर्ने निर्णय गरेका छन्।
बाराको परवानीपुर गाउँपालिकाले पुस ११ गते शुक्रबारसम्म विद्यालयको पठनपाठन बन्द गराएको छ भने सिम्रौनगढ नगरपालिकाले पनि भोलिसम्म विद्यालयमा बिदा दिएको छ। रौतहटको गौर नगरपालिकाले आजदेखि शुक्रबारसम्म सार्वजनिक बिदा दिएको छ।
यस्तै, महोत्तरीका भंगहा र रामगोपालपुर नगरपालिकाले ६ दिनका लागि विद्यालय बन्द गराएका छन्।पछिल्ला केही दिनयता तराईका जिल्लाहरूमा निरन्तर शीतलहर चलिरहेको छ।
न्यूनतम तापक्रम १३ देखि १४ डिग्री सेल्सियस आसपास मात्र रहँदा जनजीवन प्रभावित भएको छ। चिसोका कारण बालबालिका, वृद्धवृद्धा तथा विपन्न समुदाय बढी प्रभावित भएका छन्।
