तातो हावाको लहर चलेसंगै सावधानी अपनाउन विभागको आग्रह

काठमाण्डौ । तापक्रम बढेसँगै तातो हावा चलेको छ । पछिल्लो समय तराई मधेशका धेरै ठाउँको तापक्रम ४० डिग्री सेल्सियसभन्दा माथि पुगेको हो । लुम्बिनीका तराई भेग र मधेश प्रदेशमा तातो हावाको लहर चलेको हो ।

तातो हावाको लहर चलेसंगै जल तथा मौसम विज्ञान विभागले सावधानी अपनाउन आग्रह गरेको छ ।तापक्रम बढेर तातो हावा चल्दा थकाइ लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशी दुख्ने, बान्ता हुने लगायतका स्वास्थ्य समस्या देखिन सक्ने भएकाले सावधानी अपनाउँन विभागले अपिल गरेको हो।

घाममा बढी नहिँड्न, हल्का लुगा तथा सुती कपडा लगाउन, बाहिर निस्कँदा टाउको छोप्न, पटकपटक पानी तथा जुस, सर्वत, पिउन स्वास्थ्यकर्मीको सुझाव रहेको छ । भैरहवा, जनकपुर, सिमरा लगायतका ठाउँको तापक्रम ४० डिग्रीभन्दा माथि पुगेको विभागले जनाएको छ ।