नेपालमा गोताखोरको संख्या ११० पुग्यो

चितवन । नेपालमा गोताखोरको संख्या ११० पुगेको छ। चितवनको इच्छाकामना(४ कुरिनघाटमा सम्पन्न तालिममा समापनका क्रममा सशस्त्र प्रहरी अतिरिक्त महानिरीक्षक वंशीराज दाहालले देशभर गोतोखोरको सङ्ख्या ११० पुगेको जानकारी दिएका हुन्।

सशस्त्र प्रहरी बल, नेपाल विपद् व्यवस्थापन तालिम शिक्षालय कुरिनटारमा जेठ ९ गतेदेखि सञ्चालन गरिएको गोताखोर तालिम बिहीबार सम्पन्न भएको हो। शिक्षालयका समादेशक सशस्त्र प्रहरी वरिष्ठ उपरीक्षक माधवप्रसाद पौडेलले प्रशिक्षार्थीलाई चितवनको कुरिनटारस्थित त्रिशूली नदी, कास्कीको पोखरास्थित फेवाताल र सुनसरीस्थित कोशी नदीमा तालिमको अभ्यास गराएको जानकारी दिए। यस क्रममा प्रशिक्षार्थीले पानीजन्य घटना(दुर्घटनामा उद्धारसम्बन्धी नमुना अभ्यास गरेका थिए।

समापनका क्रममा बागमती प्रदेशका आन्तरिक मामिला तथा कानूनमन्त्री गंगानारायण श्रेष्ठले विपद्को जोखिममा परेका नागरिकको जीवनरक्षा गर्न आफूले सिकेको ज्ञान, सीप र अनुभव समर्पित गर्न आग्रह गरे। रासस