- ३० श्रावण २०८३, शनिबार / Aug 15, 2026
काठमाडौँ, ३१ भाद्र । संयुक्त अरब इमिरेट्स (यूएई)ले नेपालीलाई भिजिट भिसा दिन रोक लगाएको छ । सोमबार बिहानदेखि अधिकांश भिसा आवेदन अस्वीकृत हुन थालेको पुष्टि ट्राभल एजेन्सीहरूले गरेका छन् । तर, भिसा रोक लगाउनुका कारणबारे यूएई सरकारले औपचारिक जानकारी भने दिएको छैन ।
दुबई इमिरेट्सले पहिलादेखि नै भिजिट भिसामा कडाइ गर्दै आएकोमा पछिल्लो समय शारजाहमार्फत नेपालीले भिसा लिँदै आएका थिए । तर, अहिले शारजाहले समेत भिसा दिन रोक लगाएको ट्राभल व्यवसायीहरूको भनाइ छ । यसअघि शारजाहले एक महिनाको भिसा ५५० र दुई महिनाको भिसा ६५० दिरहममा उपलब्ध गराउँदै आएको थियो ।
नेपालस्थित यूएई दूतावासले भिसा रोकिने विषयमा औपचारिक जानकारी पाएको छैन । तर, यूएईमै रहेका अभियन्ताहरूले नेपालमा देखिएको राजनीतिक अस्थिरता, त्यहाँ बढ्दो नेपालीको समस्या, ओभरस्टे बस्ने, लागुपदार्थ दुव्र्यसन र आपराधिक गतिविधि बढ्दै गएको कारण भिसामा अस्थायी प्रतिबन्ध आएको हुनसक्ने बताएका छन् ।
वर्तमानमा करिब ८ लाख नेपाली यूएईमा कार्यरत छन् । तीमध्ये करिब ७० हजार नेपाली भिजिट भिसामार्फत गएर अहिले वर्किङ भिसामा रूपान्तरण भएका छन् । साथै, भिजिट भिसा प्रयोग गरेर अन्य मुलुकमा पुग्ने प्रवृत्तिले समेत समस्या बढाएको सरोकारवालाको बुझाइ छ ।
आबुधाबीस्थित नेपाली दूतावासका राजदूत तेजबहादुर क्षत्रीले यूएई अधिकारीहरूले नेपालीको संलग्नतामा आपराधिक गतिविधि बढ्दै गएको भन्दै चिन्ता व्यक्त गरेको जानकारी दिएका थिए । उनले दुबई र आबुधाबी प्रहरीले जनचेतनामूलक कार्यक्रम चलाइरहेको पनि बताए ।
