भिजिट भिसा प्रकरणमा उच्चस्तरीय छानबिन समिति गठन, तीन महिनाभित्र प्रतिवेदन बुझाउने

काठमाडाैं, १० असार । सरकारले भिजिट भिसा प्रकरणमा उच्चस्तरीय छानबिन समिति गठन गरेको छ। प्रधानमन्त्री निवास बालुवाटारमा भएको मन्त्रिपरिषद् बैठकले पूर्व मुख्यसचिव शङ्करदार वैरागीको नेतृत्वमा समिति बनाउने निर्णय गरेको हो।

यो समिति गृह, पर्यटन, श्रम र परराष्ट्र मन्त्रालयका सहसचिव सदस्य सहित गठन गरिएको छ। समितिलाई तीन महिनाभित्र छानबिन गरी प्रतिवेदन पेश गर्न तोकिएको छ। समितिले त्रिभुवन अन्तर्राष्ट्रिय विमानस्थलमा भिजिट भिसा प्रक्रियामा भएका अनियमितता विषयमा छानबिन गर्नेछ।

यसअघि भिजिट भिसा प्रकरण छानबिनका लागि सत्तारुढ दल र प्रमुख प्रतिपक्षबीच दुई बुँदे सहमति भई संसदमा छानबिन समिति वा न्यायिक आयोग गठनको माग हुँदै आएको थियो।