वाइडबडीको फाइल खुल्यो, विमान खरिदमा भ्रष्टाचार भएको निष्कर्ष, तत्कालीन पर्यटनमन्त्री जीवनबहादुर शाहीलगायतलाई मुद्दा दायर गर्दै अख्तियार

काठमाडौं । दुईवटा वाइडबडी विमान खरिदमा भ्रष्टाचार भएको निष्कर्ष अख्तियार दुरुपयोग अनुसन्धान आयोगले निकालेको छ । यसमा संलग्नहरुमाथि भ्रष्टाचारको मुद्दा दायर गर्ने तयारी गरिरहेको छ ।

तत्कालीन पर्यटनमन्त्री जीवनबहादुर शाही, नेपाल वायुसेवा निगमका महाप्रबन्धक सुगत कंसाकार लगायत भ्रष्टाचारमा संलग्नहरुलाई प्रतिवादी बनाउने निर्णय गरेको हो । लगतै विशेष अदालतमा मुद्दा दर्ता गर्न लागेको अख्तियारले जनाएको छ ।

आरोपितहरुको अरु विवरण गोप्य राखेको छ ।दुई पटक कर्णाली प्रदेशसभा सदस्य बनेका शाही अघिल्लो पटक मुख्यमन्त्री नियुक्त भएका थिए । कांग्रेसका केन्द्रीय सदस्यसमेत हुन । पाँच वर्षअघि वाईडबडी विमान खरिदको प्रक्रिया अघि बढ्नासाथ अख्तियारमा उजुरी परेको थियो ।