- २२ कार्तिक २०८३, आईतवार / Nov 8, 2026
काठमाडौं, ८ जेठ । यार्सा संकलनका लागि डोल्पा पाटनमा गएका जुम्लाका एक युवकको मृत्यु भएको छ। जुम्लाको गुठीचौर गाउँपालिका–१ मणि साँघुका २४ वर्षीय भीमबहादुर बोहराको बुधबार लेक लागेर मृत्यु भएको जिल्ला प्रहरी कार्यालय जुम्लाले जनाएको छ।
बोहरा डोल्पाको जगदुल्ला गाउँपालिका–१ अन्तर्गतको मध्यवर्ती पाटनमा यार्सा संकलन गर्न गएका थिए। सोही क्रममा उनलाई एक्कासी लेक लागेको जनाइएको छ। साथीहरूले उनलाई तत्काल उद्धार प्रयास गरी घर फर्काउने क्रममा गुठीचौर–१ स्थित बाटोमै उनको ज्यान गएको हो।
जिल्ला प्रहरी कार्यालय जुम्लाका प्रहरी नायब उपरीक्षक (डीएसपी) रविनबाबु रेग्मीका अनुसार घटनाबारे विस्तृत विवरण आउन बाँकी रहेको छ। घटनास्थलतर्फ प्रहरी निरीक्षक रोहित रसाइली नेतृत्वको टोली पठाइएको उनले जानकारी दिए।
यस वर्ष डोल्पा पाटन यार्सा संकलनका लागि जेठ ५ गतेबाट खुला गरिएको थियो। यार्सा संकलनका क्रममा उच्च हिमाली क्षेत्रको कठोर भौगोलिक अवस्था र स्वास्थ्य जोखिमका कारण यसप्रकारका घटनाहरू हरेक वर्ष देखिने गरेका छन्।
