- ३१ असार २०८३, बुधबार / Jul 15, 2026
काठमाडौं । कोरोना भाइरसको संक्रमण भएको आशंकामा भर्ना गरिएका एक जना विरामी शुक्रराज ट्रपिकल तथा सरुवा रोग अस्पताल टेकुबाट फरार भएका छन् । ती व्यक्ति गएराति अस्पतालबाट भागेको जानकारी पाएको महानगरीय प्रहरी परिसर काठमाडौंले जनाएको छ ।
मंगलबार कोरियाबाट फर्किएका इटहरीका ती व्यक्तिलाई उनको परिवारले कोरोनाको आशंकामा टेकु अस्पताल लगेका थिए । चेकजाँचका लागि अस्पतालले उनलाई भर्ना गरेको थियो । गएराति साढे १० बजेतिर अस्पतालको पछाडिपट्टीको झ्यालबाट भागेको प्रवक्ता डीएसपी होविन्द्र बोगटीले बताए ।
अस्पतालले प्रहरीलाई जानकारी गराएपछि उनको खोजी कार्य भएको बोगटीले बताए । अहिले सम्म फेला नपरेको र परिवारको सम्पर्कमा पनि नरहेको बोगटीले बताए। रिपोर्ट आउन बाँकी रहेकाले कोरोना भए–नभएको पुष्टि नभएको अस्पताल स्रोतले बतायो ।
