घर भेटघाटमा गएका साँसद १४ दिन क्वारेन्टिनमा

८ असार २०७७, भोजपुर । घर भेटघाटमा गएका प्रतिनिधिसभा साँसद सुदन किराँती गृह जिल्लामा १४ दिन क्वारेन्टिनमा बसेका छन् । रामप्रसादराई गाउँपालिकाले निर्माण गरेको क्वारेन्टिनमा उनी बसेका हुन् । कोरोनाको जोखिमलाई ध्यानमा राख्दै बाहिरबाट आएका मानिसलाई अनिवार्य क्वारेन्टिनमा बस्नुपर्ने व्यवस्था अनुसार उनी क्वारेन्टिनमा बसेको सांसद किराँतीले बताए ।

गाउँपालिकाले ओख्रेमा निर्माण गरेको क्वारेन्टिनमा बसेको भन्दै किराँतीले सरकारले जारी गरेको निर्णय पालना नगर्ने प्रवृत्ति बढ्दै गएकाले त्यसको अनिवार्यरुपमा पालन गर्नुपर्ने बताए । जनताको समस्यालाई नजिकबाट नियाल्दै आफु क्वारेन्टिनमा बसेर सरकारको नियम पालना गरिरहेको उनको भनाई छ । अहिले स्थानीय तहहरुले निर्माण गरेका क्वारेन्टिनलाई व्यवस्थित बनाउनमा पहल गर्ने समेत किराँतीको भनाइ छ ।

राजधानीमा रहेर जनतालाई राहत वितरणदेखि लिएर संसद्मा जिल्लाका विभिन्न समस्याका विषयमा सरकारको ध्यानाकर्षण गराएपश्चात् किराँती जिल्लाको पछिल्लो अवस्था बारे जानकारी लिन गृहजिल्ला पुगेका हुन् । निम्नस्तरका निमुखा मानिस मात्र क्वारेन्टिनमा बस्नुपर्ने जनगुनासो स्थानीयवासीबाट आएपछि त्यसलाई नजिकबाट नियाल्न सहयोग पुगेको उनको भनाइ छ । क्वारेन्टिनमा बस्ने क्रममा प्रतीक्षालय, शौचालय निर्माणसँगै क्वारेन्टिन आसपासमा सूचनामूलक सामग्रीसमेत टाँस गरिएको उनले जानकारी दिए ।