चीन बन्यो संसारकै धनी देश

काठमाडौं । चीनले महाशक्ति राष्ट्र अमेरिकालाई उछिन्दै विश्वकै धनी राष्ट्र बनेको छ । २० वर्षको अनुपातमा चीनको सम्पत्ति तीव्र गतिले बढिको र अमेरिकाको घटिरहेको कन्सल्टेन्सी फर्म म्याकिन्से एण्ड कम्पनीको रिपोर्टले देखाएको हो । रिपोर्टअनुसार सन् २००० मा विश्वको कुल सम्पत्ति करिब १५६ ट्रिलियन डलर थियो । तर २०२० मा विश्वको कुल सम्पत्ति बढेर ५१४ ट्रिलियन डलर पुगेको छ ।

उक्त अवधिमा वृद्धि भएको कुल सम्पत्तिमध्ये एक–तिहाई हिस्सा चीनको रहेको देखिएको । सन् २००० मा विश्व व्यापार संगठनको सदस्य बन्दा चीनको कुल सम्पत्ति ७ ट्रिलियन अर्थात् ७० खर्ब डलर थियो । सन् २०२० मा त्यहाँको कुल सम्पत्ति बढेर १२० ट्रिलियन डलर पुगेको छ । यसको अर्थ २० वर्षमा चीनको कुल सम्पत्तिमा ११३ ट्रिलियन थपिएको छ ।

विश्वको ६० प्रतिशत आय रहेका १० मुलुकको वासलात (ब्यालेन्स शीट) को जाँचपछि उक्त रिपोर्ट तयार पारिएको हो । २० वर्षको अवधिमा वृद्धि भएको विश्वको कुल सम्पत्तिमध्ये चीनले एक–तिहाई अर्थात् ३३ प्रतिशत हिस्सा ओगटेको छ । यसरी हेर्दा सो अवधिमा चीनको कुल सम्पत्तिमा १६ गुणा वृद्धि भएको रिपोर्टमा उल्लेख छ ।