- २६ श्रावण २०८३, मंगलवार / Aug 11, 2026
बाँके । बाँके राष्ट्रिय निकुञ्जले राजमार्ग क्षेत्रमा भेइकल ट्राकिङ एण्ड रिकग्नाइजेसन सिस्टम (भीटीआरएस) जडान गरेपछि तीव्रगतिमा गुड्ने सवारीसाधन धमाधम कारबाहीमा पर्दै आएका छन् ।
पूर्व पश्चिम राजमार्गको ७२ किलोमिटरमा फैलिएको बाँके राष्ट्रिय निकुञ्जमा तीब्र गतिमा गुड्ने सवारीसाधनले संरक्षित जनावरलाई ठक्कर दिने भएकाले भीटीआरएस प्रविधि जडान गरिएको निकुञ्जले जनाएको छ ।
पश्चिममा प्रगतिनगर र पूर्वमा शिवखोलामा क्यामेरा राखिएको छ भने पश्चिमबाट जाने गाडीलाई प्रगतिनगरमा रहेको क्यामेराले क्याप्चर गर्ने व्यवस्था मिलाइएको छ। क्यामेराबाट शिवखोलामा खटिएको सुरक्षाकर्मीकहाँ म्यासेज जाने सिस्टम छ ।
निकुञ्जभित्रको राजमार्ग क्षेत्रमा प्रतिघण्टा ४० किलोमिटरको गतिमा सवारी गुड्ने नियम बनाइएको छ । प्रतिघण्टा ६० किलोमिटरभन्दा तीव्र गतिमा गुडेका सवारीसाधनलाई अहिले ठाउँको ठाउँ कारबाही गरिदै आएको छ।
प्रगतिनगरबाट प्रवेश गरेका गाडीलाई शिवखोला र शिवखोलाबाट प्रवेश गरेका गाडीलाई प्रगतिनगरमा रोकेर कारबाही गरिदै आएको छ। भीटीआरएस प्रविधि जडान गरेपछि निकुञ्ज सुरक्षार्थ खटिएको नेपाली सेनाले गाडी नम्बर टिप्नुपर्ने झन्झटबाट मुक्ति पाएको छ भने गाडी इन्ट्री गर्दा हुने भीडको समस्या हटेको छ।
भीटीआरएस प्रविधि जडान गरेको एक महिना नपुग्दै धेरै सवारीसाधन कारबाहीमा परेको बाँके राष्ट्रिय निकुञ्जका प्रमुख संरक्षण अधिकृत (वार्डेन) श्यामकुमार शाहले बताए।
