- १० श्रावण २०८३, आईतवार / Jul 26, 2026
इलाम । इलामको सन्दकपुरमा खानेपानीको संकट भएको छ । सन्दकपुर गाउँपालिकामा खानेपानीको समस्या भएको हो । यहाँका स्थानीयले गाडीमा पानी ढुवानी गर्नुपर्ने बाध्यता रहेको छ । ३६ सय ३६ मिटर उचाईमा रहेको सन्दकपुर इलामको शिर र पर्यटकहरुको आकर्षणको केन्द्र भएपनि खानेपानीको समस्याले संकटमा परेको छ ।
बस्तीमुनि माई नदीको मुहान क्षेत्र भएकाले यहाँ बसोबास गर्नेहरुका लागि गाडीमा पानी बोक्नुपर्ने बाध्यता रहेको स्थानीयले बताएका छन् । धेरै पर्यटकहरु आउने गरेको यस ठाउँमा खानेपानीको समस्या समाधानका लागि होटल व्यवसायीले गाडीमा पानी ढुवानी गर्नुपर्ने बाध्यता रहेको छ । सन्दकपुर–२ मा अवस्थित सन्दकपुरमा नेपाल र भारत दुवैपट्टी होटलहरु रहेका छन् । होटल व्यवसायीले पिकअपमा प्लाष्टिकको ट्यांकीबाट पानी ढुवानी गर्दै आएका छन् ।
पिकअपमा दुई वटा प्लाष्टिकको ट्यांकीबाट पानी ढुवानी गरेको प्रत्येक ट्रिपको ८ सय रुपैयाँ लाग्ने गरेको छ । माइ नदीको मुहान क्षेत्र सन्दकपुरमा खानेपानीको समस्या भएको हो । वर्षायाममा पानी ढुवानीका लागि कच्ची सडक बाधक छ भने हिउँदामा पानीको मुहान नै जमेर बरफ बन्छ । जसले गर्दा स्थानीयले हिउँदामा हरेक दिन बरफ पग्लेपछि पानी संकलन गर्ने गरेका छन् ।
कोशी प्रदेश सरकारबाट सन्दकपुरमा खानेपानी पुर्याउन लिफ्टिङ प्रविधिबाट आयोजना संचालनका लागि पूर्वाधार निर्माणको काम भइरहेको छ । नेपाल, भारत, भुटान र चीनको तिब्बतका ६० भन्दा बढी हिमश्रृंखला दृश्यावलोकन गर्न सकिने सन्दकपुरमा विश्वका धेरै पर्यटकहरु पुग्ने गरेका छन् । होटल व्यवसायीको सुविधाका लागि कोशी प्रदेश सरकारबाट खानेपानीको सहज सुविधा उपलब्ध गराउन खानेपानी आयोजनाको काम भइरहेको जनाइएको छ ।
