उपचारका क्रममा भारतमा भएको खर्च आफैं ब्यहोर्ने राष्ट्रपति पौडेलले घोषणा

काठमाडौं । भारतमा उपचारका क्रममा भएको खर्च आफैं ब्यहोर्ने राष्ट्रपति रामचन्द्र पौडेलले घोषणा गरेका छन् । राष्ट्रपति पौडेलका प्रेस संयोजक खिला कार्कीले मंगलबार वक्तव्य जारी गर्दै राष्ट्रपतिले उपचार खर्च आफैं ब्यहोर्न चाहेको जानकारी दिएका हुन ।

सरकारी ढुकुढीबाट राष्ट्रपतिको उपचार भएकोबारे आलोचना भएपछि राष्ट्रपतिले व्यक्तिगत खर्चमै उपचार गर्ने घोषणा गरेको उल्लेख गरिएको छ । उपचारपछि राष्ट्रपति पौडेल वैशाख १७ गते स्वदेश फर्किएका थिए ।

भारतको नयाँ दिल्लीस्थित अखिल भारतीय आयुर्विज्ञान संस्थान (एम्स) मा राष्ट्रपति पौडेलको उपचार भएको थियो । राष्ट्रपति पौडेलको स्वास्थ्यमा समस्या देखिएपछि त्रिभुवन विश्वविद्यालय शिक्षण अस्पताल हुँदै भारतमा उपचार भएको हो ।