- १९ कार्तिक २०८३, बिहीबार / Nov 5, 2026
काठमाडौं । अस्तव्यस्त न्यूरोडको पार्किङ र जामको समस्या सुल्झाउन काठमाडौं महानगरपालिकाले समाधानको उपाय खोजी गर्न थालेको छ । ठूला व्यापारिक भवनमा रहेका भूमिगत पार्किङमा पसलहरु चलाएपछि यात्रुलाई न्युरोडमा गाडी र मोटरसाइकल पार्क गर्नुपर्ने बाध्यता थियो अब त्यो बाध्यता महानगरको अप्रेशन पछि हट्ने भएको हो ।
मेयर बालेन साहले भवन निर्माण गर्दाको स्वीकृत इजाजत र नक्साको प्रयोजन विपरीत भूमिगत पार्किङ नगरी पसल चलाउने न्युरोड क्षेत्रका व्यापारिक भवन र त्यहाँका व्यापारीमाथि कारवाही थालेका छन् । भूमिगत पार्किङ र गोदाममा हुनुपर्ने स्थानमा चलिरहेका अवैध पसलहरु हटाउन महानगरले सोमबारदेखि अभियान थालेको हो ।
नयाँ बानेश्वरमा स्थानीय व्यवसायीहरुलाई साथ लिएर ६ भदौबाट सुरु भएको अभियानलाई महानगरले न्युरोड क्षेत्रमा प्राथमिकता साथ अघि बढाएको स्वकीय सचिव भुपदेव शाहले बताए । बानेश्वर, दरबारमार्ग र न्युरोड क्षेत्रमा सवारीको व्यवस्थापन जटिल छ । त्यसमध्ये पनि न्युरोड क्षेत्रको जटिलता ‘अपरेसन’ गरिहाल्नुपर्ने अवस्था भएकाले महानगर अहिले यसैमा वेस्त भएको उनको निष्कर्ष छ ।
स्थानीय घरधनी र व्यवसायीको सहयोग तथा उपलब्ध स्रोत साधनको उपयोग गरेरै समस्या घटाउन बेसमेन्टहरुलाई नक्साअनुसारको प्रयोगका लागि बाध्यकारी बनाउन लागिएको मेयर शाहले बताए । महानगरको टोलीले आइतबार न्युरोड र वसन्तपुर क्षेत्रको ठूला भवनहरुमा बेसमेन्टहरुमा केमा कसरी प्रयोग भइरहेको छ भनेर स्थलगत अनुगमन गरेको थियो ।
