- ४ असार २०८३, बिहीबार / Jun 18, 2026
काठमाण्डौ । मुहान सुक्न थालेपछि पोखरा र आसपासका क्षेत्रमा पानीको समस्या पैदा भएको छ । पानी नपर्दा खोला र नदीमा पानीको मात्रा घटेकाले समस्या उत्पन्न भएको हो । पानीको समस्या उतपन्न भएसंगै अनावश्यक पानी खर्च नगर्न उपभोक्तालाई आग्रह गरेको छ ।
पोखरामा खानेपानी वितरण गर्ने मुख्य स्रोत मर्दीखोलामा पानीको सतह घटेपछि पोखरामा खानेपानीको समस्या भएको हो । नेपाल खानेपानी संस्थान पोखरा कार्यालयले खानेपानी प¥याउन गाह्रो परेको भन्दै सूचना समेत निकालेको छ ।
खानेपानीको समस्या समाधान गरिदिन भन्दै दिनहुँ सयौँ सेवाग्राहीको फोन आउने गरेको संस्थानले जनाएको छ । घरमा पानी नआएको गुनासोसहित दैनिक तीन सयभन्दा बढी फोन आउने गरेको र पोखरामा दैनिक साढे सात करोड लिटर पानी आवश्यक रहेको जनाइएको छ ।
पोखरामा अहिले दैनिक साढे पाँच करोड लिटर आपूर्ति भइरहेको र ४८ हजार धारा जडान भएका छन् । पोखरामा ल्याउने पानीको सतह घटेको संस्थानले जनाएको छ ।
पोखरामा पानीका लागि मर्दीखोला मुख्य स्रोत र त्यसपछि भोटीखोला, कालीखोला, बालधारा र बोरिङ भएपनि यी स्रोतमा नै पानी घटेका कारण समस्या भएको संस्थानले उल्लेख गरेको छ ।
