- २५ भाद्र २०८३, बिहीबार / Sep 10, 2026
काठमाडौं । नेपाल कम्युनिस्ट पार्टी (नेकपा) को सचिवालय बैठकमा अध्यक्ष प्रचण्ड र प्रधानमन्त्री केपी शर्मा ओलीको प्रस्तावमाथि छलफल प्रारम्भ भएको छ ।
बालुवाटारमा मंगलबार बसेको बैठकमा दुबै प्रस्तावमाथि छलफल प्रारम्भ भएको प्रवक्ता नारायणकाजी श्रेष्ठले बताए । कात्तिक २८ गतेको सचिवालय बैठकमा अध्यक्ष ‘प्रचण्ड’ले १९ पृष्ठको राजनीतिक प्रतिवेदन पेश गरेका थिए । भने ओलीले मंसिर १३ गतेको सचिवालय बैठकमा ३८ पृष्ठको ५३ बुँदे प्रतिवेदन पेश गरेका छन् ।
मंगलबारको सचिवालय बैठकमा दुवै प्रतिवेदनमाथि छलफल सुरु भएको हो । औपचारिक र अनौपचारिक दुबै खाले छलफललाई निरन्तरता दिएको जनाइएको छ ।
नेतापिच्छेका समूहले गतिविधि पनि प्रभावित
संघीय सरकार र ६ वटा प्रदेश सरकारको नेतृत्व गरिरहेको नेकपाभित्रको विवादले प्रदेश–२ मा पार्टी गतिविधि पनि प्रभावित बनेको छ । एकै पार्टीका कार्यकर्ताबीच झडपदेखि आफ्नै दलका नेतालाई कालोझन्डा देखाउनेसम्म गतिविधि प्रदेश–२ मा हुँदै आएका छन् । ६ कात्तिकमा शपथग्रहण कार्यक्रममा पार्टीका दुई पक्षबीच झडप हुदा मुकेश चौरसियाको मृत्यु भयो ।
नेकपा अध्यक्ष ‘प्रचण्ड’ र वरिष्ठ नेता माधवकुमार नेपाल एवं अर्का अध्यक्ष तथा प्रधानमन्त्री केपी ओलीसमूहबीच झडप भएको थियो । यस्तै, ८ मंसिरमा धनुषा मिथिला नगरपालिकास्थित तुलसी पुगेका नेकपा स्थायी कमिटी सदस्य तथा पूर्वमन्त्री रघुवीर महासेठलाई आफ्नै पार्टी कार्यकर्ताले कालोझन्डा देखाए ।
एकअर्काको विरोधमा उत्रिने प्रवृत्ति बढ्दै जाँदा प्रदेश र जिल्ला तहमा एउटा समूह आयोजक रहेका कार्यक्रममा अर्को समूहका नेता कार्यकर्ता उपस्थित नै नहुने परिपाटी बढेको छ । नदीको मुहान नै फोहोर भएपछि त्यसको प्रभाव तलसम्म देखापर्नु स्वाभाविकै हो भनेर भन्न थालेका छन् ।
