प्रदेश १ को प्रदेशसभा बैठक स्थगितहुनुमा काँग्रेसको हात

८ असार २०७७ विराटनगर । १ नम्बर प्रदेशको प्रदेशसभा बैठक स्थगित भएको छ । प्रमुख प्रतिपक्ष नेपाली काँग्रेसका सांसदहरुले उभिएर विरोध जनाएपछि सभामुख प्रदीपकुमार भण्डारीले शून्य समयको कार्यक्रम प्रारम्भ गर्न समेत पाएनन् ।

पटक पटक सांसदहरुलाई आसन ग्रहण गर्न आग्रह गरेका सभामुख भण्डारीको आग्रहलाई अस्वीकार गरेपछि काँग्रेसका प्रदेशसभा सदस्यलाई बोल्न समय दिए । प्रमुख सचेत केदार कार्कीले संसद्मा उठेका प्रश्नहरुको मुख्यमन्त्री शेरधन राईले जवाफ दिनुपर्ने नभए संसद् चल्न नदिने चेतावनी दिएका थिए ।

सरकारले कोरोना उपचार, रोकथाम एवं नियन्त्रणमा गरेको खर्च सार्वजनिक गर्नुपर्ने माग गर्दै कार्कीले प्रदेश सरकारको सचिव काठमाडौँ जाँदा प्रमुख जिल्ला अधिकारीसँग अनुमति पत्र लिनुपर्ने कुराको विरोध गरे । सरकारले यसै अधिवेशनमा प्रदेशको नामकरण गर्नुपर्ने माग गरे ।

१० मिनेटका लागि सदन स्थगन भएर पुनःशुरु भएपछि काँग्रेसका सांसदहरुले उभिएर विरोध जनाए । भोलि सदनमा मुख्यमन्त्री शेरधन राईले जवाफ दिने आश्वास प्राप्त भएको सूचनालाई पनि सांसदहरुले नमानेपछि असार ९ गते दिउँसो १ बजे संसद्को अर्को बैठक बस्ने सभामुख भण्डारीले जानकारी दिएर सदन स्थगित गरे ।