- २ कार्तिक २०८३, सोमबार / Oct 19, 2026
कैलाली । यहाँका सयौँ महिला अहिले ‘ब्युटीसियन’ पेसामा आबद्ध छन् । सीप सिकेर ब्युटीपार्लर खोली आर्थिकरुपमा सफलता पाएपछि महिला खुसी छन् ।
आयआर्जनका कार्यमा लाग्दा परिवार व्यवस्थापनमा सहयोग पुगेको उनीहरु बताउँछिन् । लम्कीकी सरिता जिसीले ब्युटीपार्लर खोलेको १४ वर्ष भयो ।
सीपमा दक्ष हुनुका साथै अरुका लागिसमेत प्रेरणाको स्रोत बन्दै आएको उनको अनुभव छ । सुरुमा रहरले पेसामा लागेकी मास्के आजभोलि यही पेशाले सन्तुष्टी दिएको बताउँछिन् ।
यही पेसाले आर्थिक अवस्थामा सुधार आएको उनको भनाइ छ । हाल आर्थिक अवस्था सुधार गर्न र बालबालिकामाथि लगानी गर्न यो पेसाले सहज बनाएको उनको भनाइ छ ।
यस्तै टीकापुरकी शिला विष्ट रावलले बच्चा हुर्काएपछि खाली समय सदुपयोग गर्न ब्युटिपार्लर सिकिन् । सिकेको सीप व्यवहारमा उतारौँ भनेर यो पेसा अगालेकी शिलाले सुरुमा एक लाखबाट पार्लर सुरु गरिन् ।
यही पसलबाट धेरै प्रगति गरिन् ।एक लाखबाट व्यवसाय सुरु गरे, हाल लाखौँको सामान छ उनले भनिन् ।
यसरी व्यवसाय गरिरहेका महिलालाई स्थानीय सरकार, ब्युटिसियनका सङ्घ संस्थालेसमेत सघाइ रहेको छ ।
उनीहरुको थप दक्षता वृद्धि, नयाँ सिक्न चाहनेलाई तालिमजस्ता कार्यक्रम भइरहेका टीकापुर नगरपालिकाका आर्थिक विकास शाखा प्रमुख नन्दबहादुर केसीले बताए ।
