- २६ असार २०८३, शुक्रबार / Jul 10, 2026
खोटाङ । कालोपत्र गर्नुअघि सडकमा बिच्छ्याइएको रोडा र ढुङ्गा कमसल भएका कारण कालोपत्र उप्किएको बताइएको छ । एसियाली विकास बैङ्कको लगानीमा दिक्तेल बजारस्थित रत्नपार्कको किराँतचोकदेखि हलेसीसम्मको ३६ किलोमिटर सडकको विभिन्न ठाउँमा कालोपत्र उप्किएको हो ।
कालोपत्र उप्किएर ठाउँठाउँमा सडक खाल्डाखुल्डी भएपछि जोखिम मोलेर यात्रा गर्नुपर्ने बाध्यता रहेको सवारी चालकले बताएका छन् । सडक कालोपत्रको जिम्मा लिएको ठेकेदार कम्पनीले नाफा कमाउने उद्देश्यले कमसल सामग्री प्रयोग गरेको स्थानीयवासीको आरोप छ । जिल्लाको प्रमुख मार्ग दिक्तेल–हलेसी सडक कालोपत्र गर्ने जिम्मा लामा नागार्जुन र लामा नागार्जुन जेभी त्रिशूलीले लिएको छ ।
सङ्घीय राजधानी काठमाडौँलगायत तराईका विभिन्न जिल्ला आवत÷जावत गर्न तथा दैनिक उपभोग्य वस्तु ढुवानीका लागि प्रयोग गरिने उक्त सडक कालोपत्र सम्पन्न भएको वर्ष दिन नपुग्दै उप्किएपछि जिल्लावासी आक्रोशित बनेका छन् । एसियाली विकास बैङ्कको रु ४६ करोड ८९ लाख ९२ हजार २२७ को लगानीमा साढे छ मिटर फराकिलो पारिएको सो सडकको साढे पाँच मिटर चौडाइमा कालोपत्र गरिएको थियो ।
तीन भागमा विभाजन गरेर कालोपत्र गरिएको उक्त सडक खण्डको हलेसीदेखि विजुलेसम्मको १२ किलोमिटर १५ करोड ५२ लाख ५१ हजार ६९६ रुपैयाँ ७५ पैसामा, विजुलेदेखि हुर्लुङसम्मको १२ किलोमिटर १५ करोड ८९ लाख ३४ हजार ५५२ रुपैयाँ ०७ पैसामा र हुर्लुङदेखि दिक्तेलसम्म १२ किलोमिटर रु १५ करोड ४८ लाख पाँच हजार ९७८ रुपैयाँ ३० पैसामा सम्पन्न गरिएको थियो ।rss
