- २१ कार्तिक २०८३, शनिबार / Nov 7, 2026
मोरङ । लेटाङ नगरपालिकामा ठेकेदारले मनोमानी ढंगले कर असुली गरिरहेको पाइएको छ। पूर्वाधार सम्भार शुल्क तोकेको भन्दा बढी लिने गरिएको हो ।
मिनी ट्रकसँग २० रुपैयाँ मात्रै लिन पाउने नियम नगरपालिकाले बनाएको छ । तर ठेकेदार कम्पनीले मिनी ट्रकलाई ५० रुपैयाँसम्म कर लिने गरेको हो ।
माथिको आदेश भन्दै नगरपालिकाले तोकेको भन्दा बढी रकम लिने गरिएको व्यवसायी बताएका छन् । आर्थिक वर्ष २०७९–०८० का लागि पाथीभरा कन्स्ट्रक्सनलाई शुल्क असुलीको ठेक्का लगाएको थियो ।
कन्स्ट्रक्सनले हाटबजार, निकासी, पूर्वाधार सम्भारसमेतका कर संकलनका लागि ठेक्का पाएको छ ।
भ्याटसहित ९२ लाख ४० हजार ८ सय ८८ रुपैयाँ बराबरमा ठेक्का पाएको कन्स्ट्रक्सनले रसिद बनाएरै आफ्ना प्रतिनिधि परिचालन गर्दै नगरपालिकाले तोकेभन्दा बढी रकम उठाइरहेको हो ।
