- २० असार २०८३, शनिबार / Jul 4, 2026
दाङ । प्राविधिक नहुँदा स्वास्थ्य तथा जनसंख्या मन्त्रालयले दाङ पठाएका १८ डायलायसिस मेसिन अलपत्र परेका छन् । साउन १३ गते राप्ती स्वास्थ्य विज्ञान प्रतिष्ठान घोराहीमा १० र राप्ती प्रादेशिक अस्पताल तुलसीपुरका लागि आठ मेसिन पठाइएका हुन् ।
तर जडानको काम अघि नबढेका कारण विरामी अन्यत्रै गएर उपचार गराउँन बाध्य छन् । जडान गर्ने प्राविधिक नहुँदा समस्या भएको राप्ती प्रादेशिक अस्पताल तुलसीपुरका डायलायसिस प्रमुख लीना बडेलले बताइन् । मेसिन आएपनि अन्य सामग्री नआएको उनको भनाइ छ ।
अहिले राप्ती प्रादेशिक अस्पतालमा पाँच डायलायसिस मेसिन छन् जसबाट २३ जनाले सेवा लिइरहेका छन् । थप आठ मेसिन जडान भएमा ६० जनासम्म बिरामीले सेवा पाउने छन् । त्यस्तै, राप्ती स्वास्थ्य विज्ञान प्रतिष्ठानमा पाँच मेसिन छन् ।
अहिलेसम्म २५ बिरामीले सेवा लिइरहेका छन् । १० मेसिन थपिएसँगै यस क्षेत्रका धेरै बिरामीले सेवा पाउने सूचना अधिकारी निशान भट्टराईले बताए । अहिले दुई चरणमा मात्रै सेवा दिने गरिएको छ ।
चौबीसै घण्टा सेवा दिन सकिने अवस्था भएपनि अहिले करिब ४० बिरामी उपचारको प्रतीक्षामा बसेका छन् । उनीहरूलाई सेवा दिन सकिने अवस्था छ ।
