- १३ भाद्र २०८३, शनिबार / Aug 29, 2026
काठमाडौं । राष्ट्रपति निर्वाचनका लागि निर्वाचन आयोगले निर्वाचन अधिकृत तोक्ने र मतदान स्थल तय गर्ने काम गरेको छ । फागुन २५ गते हुने राष्ट्रपति निर्वाचनका लागि निर्वाचन आयोगले उक्त काम अघि बढाएको हो । आयोगले पाटन उच्च अदालतका न्यायाधीश महेश शर्मा पौडेललाई मतदान अधिकृत तोकेको र मतदान स्थल नयाँ बानेश्वरस्थित संघीय संसद भवन परिसरलाई बनाइने जनाएको छ । नयाँ बानेश्वरमा रहेको संसद भवन परिसरमा दुई वटा मतदान केन्द्र रहनेछन् ।
आयोगले जारी गरेको कार्यतालिका अनुसार फागुन १० गते बुधबार मतदाता नामावली सार्वजनिक गरिँदैछ । राष्ट्रपति निर्वाचनमा संघीय संसद र प्रदेश सभाका सदस्यहरू मतदाता हुन्छन् । जसअनुसार सातै प्रदेशका प्रदेश सभा सचिवालयले मतदाताका नाम पठाइसकेका छन् । दलहरूले राष्ट्रपति उम्मेदवार कसलाई बनाउने टुंगो लगाइसकेका छैनन्।
प्रधानमन्त्री पुष्पकमल दाहाल प्रचण्ड र उनले नेतृत्व गरिरहेको नेकपा माओवादी केन्द्रले राष्ट्रपति चुनावमा राष्ट्रिय सहमतिका लागि पहल गर्ने बताइरहेका छन्। नेपाली कांग्रेसले राष्ट्रपति निर्वाचनमा उम्मेदवारी दिने निर्णय गरिसकेको छ भने उम्मेदवार टुंग्याएको छैन।
नेकपा एमालेले पनि गत पुस १० को सहमतिअनुसार राष्ट्रपति सत्ता गठबन्धनबाट साझा उम्मेदवारका रूपमा एमालेबाट उठाइने उम्मेदवार हुनुपर्ने अडान राखेको छ। राष्ट्रपति निर्वाचनका लागि यही फागुन १३ गते उम्मेदवारको मनोनयन दर्ता गर्नुपर्ने निर्वाचन आयोगको तालिका रहेको छ ।
