- ३१ असार २०८३, बुधबार / Jul 15, 2026
काठमाडौँ । प्रधानन्यायाधीश नियुक्तिका विषयमा छलफल गर्न आज बसेको संवैधानिक परिषद्को बैठक निष्कर्षविहीन भएको छ । लामो समयको अन्तरालपछि बुधबार बिहान बसेको संवैधानिक परिषद्को बैठक बिनानिस्कर्ष टुंगिएको हो ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको संवैधानिक परिषद्को बैठक प्रधानन्यायाधीश नियुक्ति प्रक्रिया अघि बढाउने निष्कर्षमा नपुगी टुंगिएको राष्ट्रिय सभा अध्यक्ष गणेशप्रसाद तिमिल्सिनाले जानकारी दिए ।
प्रधानमन्त्री पुष्पकमल दाहालको अध्यक्षतामा बसेको बैठकमा प्रतिनिधि सभाका सभामुख देवराज घिमिरे, राष्ट्रिय सभा अध्यक्ष गणेशप्रसाद तिमिल्सिना, उपसभामुख इन्दिरा राना, उपप्रधानमन्त्री एवं रक्षा तथा कानून, न्याय र संसदीय मामिलामन्त्री पूर्णबहादुर खड्का र प्रमुख प्रतिपक्षी दलका नेता केपी शर्मा ओली सहभागी थिए।
वैशाख ४ गते नेकपा (एमाले) अध्यक्ष ओलीको निजी निवास बालकोटमा बसेको प्रमुख तीन दलबीचको बैठकले संवैधानिक परिषद्को बैठक राखेर प्रधानन्यायाधीश नियुक्तिको सिफारिस गर्ने सहमति भएको थियो ।
राजनीतिक दलहरुबीच दूरी बढ्दा संवैधानिक परिषद्को बैठक समेत बस्न सकेको थिएन । जसका कारण सर्वोच्च अदालत १४ महिनादेखि नेतृत्वविहिन अवस्थामा रहेको छ ।
