- ३१ असार २०८३, बुधबार / Jul 15, 2026
गाईघाट । नेपाल नागरिक उड्डयन प्राधिकरणले सहमति अनुसार काम नगरेको कारण देखाउदै वन तथा भू–संरक्षण विभागले रुख काट्ने काम रोकिदिएको छ । उदयपुरको त्रियुगा नगरपालिका १ र २ जोगीदहस्थित सगरमाथा आन्तरिक विमानस्थल निर्माण क्षेत्रमा रुख कटानको काम सहमति अनुसार काम नगरेको भन्दै विभागले रोकिदिएको हो ।
रुख कटान गत असोजबाट सामुदायिक वन क्षेत्रका रुख कटान गर्न थालेको थियो । रुख काट्ने अनुमति पाएको रुण माँ दुर्गा शक्ति जेभी विराटनगर मोरङले छ महिनाको अवधिमा मोतियाही सामुदायिक वन उपभोक्ता समूहको ६२.३० हेक्टरको चार हजार ३ सय ५७ रुख मात्र कटान गरेको छ ।
पूर्वसहमतिअनुरूप प्राधिकरण र विभागबीच विमानस्थलले प्रयोग गरे जति जग्गा अन्यत्र उपलब्ध गराउनुपर्ने र त्यहाँ हरियाली बनाउन ४० हजार ९२५ वटा बिरुवा रोप्ने पैसा वन विभागलाई उपलब्ध गराउनुपर्नेमा प्राधिकरणले उपलब्ध नगराएपछि रुख काट्न रोकिएको डिभिजन वन कार्यालय गाईघाटले जनाएको छ ।
यस क्षेत्रमा एक हजार ७५० मिटर लामो र ३० मिटर चौडाइ भएको धावन मार्ग, दुई सय मिटर लामो र ६० मिटर चौडाइको एप्रोनसहितको टर्मिनल भवन, कर्मचारी भवन र ट्याक्सी वे दुईवटा समेतका लागि १५६.११ हेक्टर वन क्षेत्रको जग्गा अधिकरण गरी सकिएको छ । कङ्ग सामुदायिक वन उपभोक्ता समूहका ४२.८० हेक्टर क्षेत्रमा रहेको विभिन्न जातको नौ हजार २८० वटा रुख कटान गर्न बाँकी रहे पनि वन विभागले कटानको काम रोकेको छ ।
राष्ट्रिय योजना आयोगले सगरमाथा आन्तरिक विमानस्थललाई राष्ट्रिय प्राथमिकता प्राप्त योजनामा समावेश गरी काम बढाएको थियो । संस्कृति, पर्यटन तथा नागरिक उड्डयन मन्त्रालयले सगरमाथा विमानस्थल राष्ट्रिय प्राथमिकता प्राप्त योजनाको सूचीमा राखेर काम अघि बढाएको आयोजना हो ।
विभाग र प्राधिकरणबीच २०७८ माघ २४ गते भएको सम्झौताबमोजिम रुख छपानको काम सकेर कटान थालिएको थियो । सम्झौतामा विमानस्थल निर्माणका लागि १५६.११ हेक्टर क्षेत्रफलमध्ये १०५.१० हेक्टरमा रहेको रुख मात्र काटिने र बाँकी रहेको ५०.४१ हेक्टरमा हरियाली कायम गर्ने उल्लेख गरिएको छ । जसमा १३ हजार ६३७ वटा रुख काटिनेछ ।
